वीरगंज । पर्सा जिल्लामा सशस्त्र प्रहरी बल नेपालले अवैध रूपमा भन्सार छली गरी नेपाल भित्र्याउँदै गरिएका २२ थान ईलेक्ट्रिक स्कुटर नियन्त्रणमा लिएको छ।
बिहिबार सशस्त्र प्रहरी बल, नेपाल नं. १३ गण हेडक्वार्टर पर्साको टोलीले जिल्लाका विभिन्न नाकाबाट ती स्कुटरहरू बरामद गरेको हो।
बरामद गरिएका स्कुटरमध्ये वीरगंज महानगरपालिका–१६ स्थित मुख्य भन्सार नाकाबाट १४ थान, वीरगंज महानगरपालिका–२५ स्थित सिर्सिया नाकाबाट ७ थान तथा बिन्दवासिनी गाउँपालिका–५ स्थित प्रसौनीभाठा नाकाबाट १ थान स्कुटर फेला परेको सशस्त्र प्रहरीले जनाएको छ।
उक्त स्कुटरहरू भन्सार छली गरी नेपाल भित्र्याउने क्रममा रहेका व्यक्तिहरू प्रहरीलाई देख्नासाथ फरार भएका थिए। उनीहरूलाई खोजी कार्य जारी रहेको जनाइएको छ।
बरामद गरिएका करिब १७ लाख ३० हजार रुपैयाँ बराबरका ईलेक्ट्रिक स्कुटरहरू आवश्यक कारबाहीका लागि वीरगंज भन्सार कार्यालयमा बुझाइएको सशस्त्र प्रहरी बल नेपाल नं. १३ गण, पर्साका सूचना अधिकारी प्रहरी नायब उपरीक्षक मोहन राज निरौलाले जानकारी दिए ।
