सेढवा । पर्साको ग्रामीण क्षेत्रमा विगत एक सातादेखि वातावरणीय तथा वायु प्रदूषण अत्यधिक बढ्दै जाँदा स्थानीय जनजीवन कष्टकर बन्दै गएको छ। पर्सा तथा चितवन राष्ट्रिय निकुञ्ज आसपासका वन क्षेत्रमा लागेको डढेलोले वातावरणमा धुवाँ फैलिँदा प्रदूषण झन् तीव्र बनेको हो।
यसका साथै किसानहरूले गहुँबाली भित्र्याउने क्रममा उड्ने धुलो, गहुँको छवाली जलाउँदा निस्किने धुवाँ तथा लामो समयदेखि वर्षा नहुँदा सडकबाट उड्ने धुलोले पनि प्रदूषण थप बढाएको स्थानीयले बताएका छन्। चौबिसै घण्टा धुलो र धुवाँ फैलिँदा दैनिक जीवन प्रभावित बनेको छ।
जगरनाथपुर गाउँपालिका–४ का स्थानीय दिनदयाल दास थारुका अनुसार बिहानैदेखि वातावरण धुम्म हुने, आँखा पोल्ने, आँसु आउने, आँखा रातो हुने तथा श्वास–प्रश्वासमा समस्या देखिन थालेको छ। अत्यधिक प्रदूषणका कारण घरभित्र बस्नसमेत असहज भएको र यात्रा गर्न समेत कठिनाइ भइरहेको उनले बताए।
वायु प्रदूषणको प्रभाव ठोरी, जिराभवानी, जगरनाथपुर, पटेर्वासुगौली, सखुवाप्रसौनी गाउँपालिका, पर्सागढी नगरपालिका तथा वीरगञ्ज महानगरपालिकाका केही वडामा देखिएको छ।
पटेर्वासुगौली गाउँपालिकाका स्वास्थ्य शाखा प्रमुख भुजेन्द्र यादवका अनुसार वायु प्रदूषणले मानव स्वास्थ्यमा गम्भीर असर पारिरहेको छ। विशेषगरी मुटु, फोक्सो तथा श्वास–प्रश्वाससम्बन्धी दीर्घरोगीहरूका लागि हालको अवस्था निकै जोखिमपूर्ण रहेको उनले बताए। साथै प्रदूषित वातावरणका कारण आँखामा संक्रमणको जोखिम पनि बढेको उनको भनाइ छ।
यस्तै, ठोरी गाउँपालिकाका स्वास्थ्य शाखा प्रमुख रमेशराज थिङ्गले धुलो र धुवाबाट जोगिन आवश्यक सावधानी अपनाउन आग्रह गरेका छन्। अत्यावश्यक काम बाहेक बाहिर ननिस्किन, बाहिर निस्किँदा मास्क र चस्मा प्रयोग गर्न तथा मोटरसाइकल चलाउँदा हेल्मेट प्रयोग गर्न उनले सुझाव दिएका छन्।
कुनै स्वास्थ्य समस्या देखिएमा नजिकको स्वास्थ्य संस्थामा तुरुन्त जाँच गराउन पनि उनले आग्रह गरेका छन्।
हाल देखिएको वायु प्रदूषण नियन्त्रणका लागि सम्बन्धित निकायले डढेलो नियन्त्रण, धुलो व्यवस्थापन तथा जनचेतना अभिवृद्धिमा तत्काल ध्यान दिनुपर्ने देखिएको छ।
