वीरगंज । पर्सा जिल्लामा वेवारिसे शवहरूको सम्मानजनक व्यवस्थापन तथा सडकमा अलपत्र परेका व्यक्तिहरूको उद्धार र पुनर्मिलन गर्ने उद्देश्यले ‘वेवारिसे शव व्यवस्थापन तथा पुनर्जीवन केन्द्र’ गठन गरिएको छ। विजय श्रीवास्तवको संयोजकत्वमा २१ सदस्यीय कार्यसमिति गठन गरिएको जानकारी शुक्रबार वीरगञ्जमा आयोजित पत्रकार सम्मेलनमार्फत दिइएको हो।
केन्द्रका संस्थापक विजय जंग बस्नेतको अध्यक्षतामा सम्पन्न कार्यक्रममा नवगठित समितिको सचिवमा आरोही श्रीवास्तव, रिंकी कुमारी कुम्हार र प्रेरणा श्रीवास्तव चयन भएका छन्। त्यसैगरी उप–सचिवमा नारायण श्रीवास्तव, लेखापालमा आराध्या श्रीवास्तव, महिला विभाग प्रमुखमा रिता श्रीवास्तव तथा मिडिया कोअर्डिनेटरमा आराध्य श्रीवास्तव चयन गरिएको छ।
कार्यक्रमलाई सम्बोधन गर्दै बस्नेतले विगत १६ वर्षमा ७ हजार ७ सय ३८ वटा वेवारिसे शवहरूको सम्मानपूर्वक सद्गत गरिएको जानकारी दिए। सडकपेटीमा भेटिने वेवारिसे शवहरूको उचित व्यवस्थापन नभएको देखिएपछि काठमाडौँबाट यो अभियान सुरु गरिएको उनले बताए।
यस अभियानलाई निरन्तरता दिन आफूले व्यक्तिगत रूपमा दुई रोपनी जग्गा बिक्री गरेर लगानी गरिसकेको समेत उनले जानकारी दिए। हालसम्म काठमाडौँसहित देशका ५४ जिल्लामा सेवा विस्तार गरिसकेको संस्थाले अब पर्सा जिल्लामा पनि वेवारिसे शवहरूको व्यवस्थापन गर्ने र सडकमा भेटिने बेवारिसे व्यक्तिहरूको हेरचाह गर्दै उनीहरूलाई आफन्तसँग पुनर्मिलन गराउने लक्ष्य लिएको छ।
केन्द्र गठनसँगै पर्सामा सामाजिक उत्तरदायित्वको क्षेत्रमा महत्वपूर्ण पहल हुने विश्वास गरिएको छ।
