वीरगंज । पर्सा जिल्लाका तीन स्थानीय तहमा प्रमुख प्रशासकीय अधिकृत परिवर्तन गरिएको छ । संघीय मामिला तथा सामान्य प्रशासन मन्त्रालयले पोखरिया नगरपालिका, बहुदरमाई नगरपालिका र कालिकामाई गाउँपालिकामा नयाँ प्रमुख प्रशासकीय अधिकृत खटाएको हो।
मन्त्रालयले पोखरिया नगरपालिकामा उपसचिव शेखर पौड्याललाई प्रमुख प्रशासकीय अधिकृतको जिम्मेवारीसहित पठाएको छ। गृह मन्त्रालयमा कार्यरत पौड्याललाई नयाँ जिम्मेवारी दिइएको हो । यसअघि यहाँ निमित्त प्रमुख प्रशासकीय अधिकृतको रूपमा कौशल झा कार्यरत थिए।
त्यसैगरी बहुदरमाई नगरपालिकामा उपसचिव रमेश अधिकारीलाई खटाइएको छ । उद्योग, वाणिज्य तथा आपूर्ति मन्त्रालयमा कार्यरत अधिकारीलाई बहुदरमाई पठाइएको हो । यहाँ यसअघि प्रमुख प्रशासकीय अधिकृतका रूपमा वृजकिशोर प्रसाद कार्यरत थिए ।
यस्तै, कालिकामाई गाउँपालिकामा प्रमुख प्रशासकीय अधिकृतका रूपमा केशव कुमार अधिकारीलाई पठाइएको छ । यहाँ कार्यरत रहेका राज कुशवाहालाई गृह मन्त्रालय अन्तर्गत सरुवा गरिएको छ भने संघीय मामिला तथा सामान्य प्रशासन मन्त्रालयको अतिरिक्त समूहमा रहेका अधिकारीलाई कालिकामाईमा जिम्मेवारी दिइएको हो ।
मन्त्रालयले गत चैत ३० गतेको निर्णयअनुसार २१ जना उपसचिव र ६ जना शाखा अधिकृतको एकैपटक सरुवा गरेको थियो । सोही निर्णयअन्तर्गत पर्साका तीन पालिकामा नयाँ प्रमुख प्रशासकीय अधिकृत खटाइएकाे संघिय मामिला तथा सामान्य प्रशासन मन्त्रालयले जनाएकाे छ ।
