वीरगंज । वीरगंज महानगरपालिका–१० मा डेरा गरी बस्दै आएकी एक युवतीले आफ्नै कोठामा आत्महत्या गरेकी छन्। रौतहटको दिपही निवासी २० वर्षीया माही गुप्ता (पवन कुमारी गुप्ता) को शव आइतबार बिहान फेला परेको हो।
प्रहरीका अनुसार आज बिहान आफ्नै कोठाभित्र पासो लगाएको अवस्थामा उनको शव फेला परेको हो। उनी मोडलिङ क्षेत्रमा सक्रिय रहँदै आएकी थिइन् भने टिकटकमार्फत पनि चर्चित व्यक्तिका रूपमा चिनिन्थिन्।
प्रारम्भिक जानकारीअनुसार उनले आफ्नै गाउँका विवेक गुप्तासँग प्रेम विवाह गरेकी थिइन् । पछिल्लो समय दुवैबीच वैवाहिक सम्बन्धमा तनाव बढ्दै गएको र श्रीमानले दोस्रो विवाहको तयारी गरिरहेको कारण उनी मानसिक तनावमा रहेको उनका नजिकका साथीहरूले बताएका छन्।
आत्महत्या गर्नु अघि उनले आफ्नो टिकटक आइडीमार्फत भिडियो पोस्ट गर्दै आफ्नो भावनात्मक पीडा व्यक्त गरेकी थिइन्।
घटनास्थलमा प्रहरी पुगेर आवश्यक अनुसन्धान गरिरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिएका छन्।
