वीरगंज । वीरगंजमा महिला जनप्रतिनिधिहरूका लागि लैङ्गिक उत्तरदायित्व, समावेशी शासन तथा डिजिटल हिंसासम्बन्धी तीन दिने तालिम बिहीबारदेखि सुरु भएको छ।
बारा र पर्सा जिल्लाका निर्वाचित महिला जनप्रतिनिधिहरूलाई लक्षित गर्दै महिला पुनर्स्थापना केन्द्र (ओरेक) नेपालले उक्त तालिम सञ्चालन गरेको हो। महिला जनप्रतिनिधिहरूलाई आफ्नो जिम्मेवारीप्रति अझ सचेत बनाउनुका साथै बढ्दो डिजिटल हिंसाबाट सुरक्षित रहन आवश्यक ज्ञान र सीप प्रदान गर्ने उद्देश्यले तालिम आयोजना गरिएको जनाइएको छ।
तालिममा बाराको आदर्शकोतवाल गाउँपालिका तथा पर्साको वीरगंज महानगरपालिका, पकाहमैनपुर गाउँपालिका र बिन्दबासिनी गाउँपालिकाका निर्वाचित महिला जनप्रतिनिधिहरूको सहभागिता रहेको छ।
ओरेक नेपालकी परियोजना संयोजक मिलन कार्कीका अनुसार तालिममार्फत सहभागीहरूलाई उनीहरूको अधिकार, कर्तव्य र भूमिकाबारे जानकारी गराइनेछ। साथै डिजिटल माध्यमको सुरक्षित र प्रभावकारी प्रयोग, अनलाइन दुर्व्यवहारबाट जोगिने उपाय तथा डिजिटल साक्षरतासम्बन्धी विषयमा पनि प्रशिक्षण दिइने उनले बताइन्।
तालिममा जेसी विज्ञ गीता सुवेदीले प्रशिक्षण दिइरहेकी छन्। उनले स्थानीय तहमा नीति तथा कार्यक्रम कार्यान्वयन, लैङ्गिक संवेदनशील योजना निर्माण तथा पालिकाबीच समन्वयका विषयमा प्रशिक्षण दिँदै डिजिटल माध्यमको सचेत प्रयोग आवश्यक रहेको बताइन्। “डिजिटल प्लेटफर्म अवसर पनि हो, जोखिम पनि। त्यसैले सचेत भएर प्रयोग गर्न सके महिलाहरूको आवाज अझ सशक्त बन्न सक्छ,” उनले भनिन्।
ओरेक नेपाल मधेश प्रदेश संयोजक बीना कुमारी सिंहका अनुसार तालिममा लैङ्गिक हिंसा न्यूनीकरणमा जनप्रतिनिधिहरूको भूमिका, लैङ्गिक मैत्री बजेट निर्माण तथा समावेशी योजना तर्जुमालगायतका विषय समेटिएका छन्।
यसैबीच, ओरेक नेपालले मधेश प्रदेशसँगै कर्णाली र सुदूरपश्चिम प्रदेशका विभिन्न पालिकाहरूमा पनि लैङ्गिक हिंसा नियन्त्रण तथा महिला सशक्तीकरणका लागि विभिन्न कार्यक्रम सञ्चालन गर्दै आएको जनाएको छ।
तालिमले स्थानीय तहमा महिला नेतृत्व सशक्त बनाउन, लैङ्गिकमैत्री नीति तथा कार्यक्रम निर्माणमा सहयोग पुर्याउन तथा सुरक्षित डिजिटल वातावरण निर्माणमा टेवा पुग्ने सहभागीहरूको अपेक्षा रहेको छ।
