वीरगंज । अख्तियार दुरुपयोग अनुसन्धान आयोगले मंगलबार प्रहरी वृत्त मालीगाउँ र राैतहट जिल्ला अदालतमा गरेकाे स्टिंग अपरेशनमा घुस/रिसवत लिएको आरोपमा दुई जना कर्मचारीलाई नियन्त्रणमा लिई थप अनुसन्धान अघि बढाएको छ ।
आयोगका अनुसार प्रहरी वृत्त मालीगाउँमा कार्यरत प्रहरी नायव निरीक्षक दिनेश राउतले बैंकिङ कसुरसम्बन्धी मुद्दामा जाहेरवालाको रकम फिर्ता गराइदिने तथा मिलापत्र गराइदिने नाममा सेवाग्राहीसँग घुस माग गरी दुःख हैरानी दिएको उजुरी परेको थियो । सोही आधारमा टंगालबाट खटिएको टोलीले उनलाई काठमाडौं महानगरपालिका वडा नं. ०५ स्थित गहनापोखरीबाट रु. २० हजार घुस लिइसकेको अवस्थामा नगद रकम र मोबाइलसहित नियन्त्रणमा लिएको हो।
त्यस्तै, रौतहट जिल्ला अदालतमा कार्यरत डिठ्ठा लव कुमार सिंहले अदालतको फैसलाअनुसार जग्गा फुकुवा गराइदिने क्रममा सेवाग्राहीसँग घुस माग गरेको उजुरीपछि गौर नगरपालिका स्थित अदालत परिसरबाट उनलाई रु. ५० हजार घुससहित पक्राउ गरिएको आयोगले जनाएको छ।
दुवै घटनामा संलग्न व्यक्तिहरूलाई नियन्त्रणमा लिएर आवश्यक अनुसन्धान प्रक्रिया अगाडि बढाइएको आयोगका प्रवक्ता सुरेश न्यौपानेले जानकारी दिएका छन्।
