वीरगंज भन्सार नाकामा २० लाखभन्दा बढी अवैध नगदसहित एक जना पक्राउ

वीरगंज । सशस्त्र प्रहरी बल, नेपाल पर्साले वीरगंज भन्सार क्षेत्रबाट २० लाख रुपैयाँभन्दा बढी अवैध नगदसहित एक जनालाई नियन्त्रणमा लिएको छ।

मिति २०८२ चैत ६ गते बिहान ११:५० बजे जिल्ला पर्सा, वीरगंज महानगरपालिका–१६ स्थित भन्सार मेनगेटमा खटिएको सशस्त्र प्रहरीको चेकपोष्ट टोलीले विशेष सूचनाको आधारमा भारतबाट नेपालतर्फ आउँदै गरेको बिआर०५बिके ८६०३ नम्बरको मोटरसाइकल जाँच गरेको थियो।

जाँचका क्रममा मोटरसाइकल चालक वीरगंज महानगरपालिका–१७ अलौ निवासी ५० वर्षीय विनय शंकर साह तुरहाले सिट कभरमुनि प्लास्टिकमा प्याक गरी लुकाइछिपाइ ल्याउँदै गरेको नगद फेला परेको सशस्त्र प्रहरीले जनाएकाे छ ।

बरामद गरिएको नगदमध्ये नेपाली रुपैयाँ २० लाख २ हजार ५० र भारतीय रुपैयाँ ६०० रहेको सशस्त्र प्रहरीले जनाएको छ। विवरणअनुसार १ हजार दरका १३०२ थान (१३,०२,००० रुपैयाँ), ५०० दरका १४०० थान (७,००,००० रुपैयाँ) र ५० दरको १ थान नोट बरामद भएको छ।

यसका साथै घटनास्थलबाट सामसुङ ग्यालेक्सी A15 मोडेलको एक थान मोबाइल र “वीरगंज भन्सार एजेन्ट संघ, पर्सा” लेखिएको परिचयपत्र समेत फेला परेको छ।

नियन्त्रणमा लिइएको व्यक्ति, नगद र मोटरसाइकललाई आवश्यक कारबाहीका लागि वीरगंज भन्सार कार्यालय पर्सामा बुझाइएकोसशस्त्र प्रहरी वल,नेपाल नं. १३ गण हे.क्वा.पर्साका सूचना अधिकारी प्रहरी नायब उपरीक्षक मोहनराज निरौलाले जानकारी दिए ।