वीरगंज । जनकपुरमा टिपरको ठक्करबाट मोटरसाइकलमा सवार एक महिला प्रहरीको मृत्यु भएको छ भने प्रहरी निरीक्षक घाइते भएका छन् । दुर्घटनामा जिल्ला ट्राफिक प्रहरी कार्यालय बर्दिबासमा कार्यरत प्रहरी जवान चन्द्रकला कुमारीको ज्यान गएको प्रहरीले जनाएको छ।
प्रहरीका अनुसार मधेश प्रदेश प्रहरी कार्यालय लेखा शाखाका प्रमुख प्रहरी निरीक्षक विजय कुमार यादवले चलाएको मोटरसाइकललाई पछाडिबाट टिपरले ठक्कर दिएको थियो । माेटरसाइकलकाे पछाडी सवार चन्द्रकला ठक्करबाट गम्भिर घाइते भएकी थिइन । उनकाे उपचारका क्रममा मृत्यु भएको हो । मोटरसाइकल चालक प्रहरी निरीक्षक यादव घाइते भएका छन्।
जनकपुरकाे मुरली चोकबाट जिरोमाईलतर्फ जाँदै गरेको प्रदेश २–०३–००१ क ०१०४ नम्बरको टिपरले सोही दिशातर्फ गइरहेको प्रदेश २–०२–००२ प ७३५२ नम्बरको मोटरसाइकललाई पछाडिबाट ठक्कर दिएको थियो।
दुर्घटनापछि दुवै सवारी साधन र टिपर चालक सुनिल रविदासलाई जिल्ला प्रहरी कार्यालय धनुषाले नियन्त्रणमा लिएको जनाएको छ। रविदास धनुषाको मिथिला नगरपालिका–२, आनन्दपुरका ३० वर्षीय निवासी हुन्।
घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ ।
