वीरगंज । नेकपा (एमाले) पर्सा निर्वाचन क्षेत्र नं. ३ का प्रतिनिधिसभा सदस्य उम्मेदवार रुपेश कुमार पाण्डेयले आफ्नो घोषणा पत्र सार्वजनिक गरेका छन् । उनले सामाजिक सञ्जाल फेसबुकमार्फत सार्वजनिक गरेको प्रतिबद्धतामा रोजगारी, कृषि, स्वास्थ्य, शिक्षा, पूर्वाधार र सामाजिक सुरक्षा क्षेत्रलाई प्राथमिकतामा राखिएको छ।
घोषणा पत्रमा स्वदेशमै रोजगारी सिर्जना कार्यक्रम सञ्चालन गर्ने, साना तथा मझौला उद्योगलाई सहुलियत ऋण उपलब्ध गराउने तथा स्टार्टअप र सूचना प्रविधि क्षेत्रमा प्रोत्साहनका कार्यक्रम अघि सारिएका छन्।
कृषि तथा पशुपालनतर्फ कृषिमा आधुनिकीकरण र मेकानाइजेसन, मल र बीउमा अनुदान तथा युवालाई कृषि उद्यममा आकर्षित गर्ने नीति समावेश गरिएको छ।
स्वास्थ्य क्षेत्रअन्तर्गत जिल्ला अस्पताल स्तरोन्नति, निःशुल्क आधारभूत स्वास्थ्य सेवा विस्तार र स्वास्थ्य बीमा कार्यक्रम सुधार गर्ने योजना उल्लेख गरिएको छ। शिक्षा क्षेत्रमा सार्वजनिक विद्यालय सुधार, प्राविधिक तथा व्यावसायिक शिक्षामा जोड र डिजिटल शिक्षाको विस्तारलाई प्राथमिकता दिइएको छ।
त्यस्तै, पूर्वाधार विकासतर्फ सडक र पुल निर्माण, जलविद्युत आयोजना तीव्रता तथा सिँचाइ र खानेपानी परियोजना विस्तार गर्ने प्रतिबद्धता जनाइएको छ। सामाजिक सुरक्षामा वृद्धभत्ता तथा अन्य सामाजिक सुरक्षा भत्ता निरन्तरता र गरिबी निवारण कार्यक्रम विस्तार गर्ने योजना घोषणा पत्रमा समेटिएको छ ।
