रौतहट । रौतहटको गौर नगरपालिकामा जारी कर्फ्यु आदेश उल्लङ्घन गरेको आरोपमा १८ जनालाई पक्राउ गरिएको छ। जिल्ला प्रशासन कार्यालयका प्रमुख जिल्ला अधिकारी दिनेश सागर भुसालका अनुसार निषेधित क्षेत्रमा आवतजावत गर्ने तथा समूह बनाएर भेला हुन खोज्नेहरूलाई नियन्त्रणमा लिइएको हो।
प्रशासनका अनुसार सदरमुकाम गौरमा लागू कर्फ्यु आदेश अवज्ञा गर्दै हिँडडुल र समूहगत भेला हुन खोजेपछि उनीहरूलाई पक्राउ गरिएको हो। पक्राउ परेकामाथि प्रचलित कानुनअनुसार कारबाही प्रक्रिया अघि बढाइने बताइएको छ।
जिल्ला सुरक्षा समितिको निर्णयअनुसार शनिबार दिउँसो १ बजेदेखि अर्को आदेश नभएसम्म गौर नगरपालिकाका विभिन्न क्षेत्रमा कर्फ्यु जारी गरिएको छ। कर्फ्यु क्षेत्रमा कुनै पनि व्यक्ति आवतजावत, भेला, सभा, जुलुस वा प्रदर्शन गर्न पूर्णरूपमा रोक लगाइएको प्रशासनले जनाएको छ।
कर्फ्युको दायरामा पूर्वमा मुडवलवा गेट, पश्चिमतर्फ ललवैया बाँध, उत्तरमा बम नहर र दक्षिणतर्फ गौर भन्सार कार्यालय गेटसम्मको क्षेत्र समेटिएको छ।
प्रहरीका अनुसार गौर नगरपालिका–६ स्थित सवगढा क्षेत्रमा दुई समुदायबीच पुनः झडप भएपछि स्थिति तनावपूर्ण बनेको हो। विवाद शुक्रबार साँझबाट सुरु भई शनिबारसम्म जारी रहेपछि प्रशासनले सुरक्षा सतर्कता बढाएको छ। हालसम्म कुनै ठूलो मानवीय क्षति नभएको र अवस्था नियन्त्रणमा रहेको जनाइएको छ।
झडपका क्रममा तीन वटा गाडी र दुई वटा मोटरसाइकलमा आगजनी भएको तथा गौरस्थित एक पेट्रोल पम्पमा तोडफोड गरिएको प्रहरीले जनाएको छ। जिल्ला प्रहरी कार्यालय रौतहटका डीएसपी विष्णु प्रदीप बस्यालले घटनाको कारण र संलग्न व्यक्तिबारे अनुसन्धान जारी रहेको जानकारी दिए।
यसैबीच, फागुन ८ देखि इस्लाम धर्मावलम्बीहरूको प्रमुख पर्व रमजान सुरु भएको सन्दर्भमा प्रशासनले सबै पक्षलाई संयमता अपनाउन, धार्मिक सहिष्णुता कायम राख्न तथा कर्फ्यु पूर्णरूपमा पालना गर्न आग्रह गरेको छ। नेपाल प्रहरी र सशस्त्र प्रहरी बलका सयौँ सुरक्षाकर्मी परिचालन गरी संवेदनशील क्षेत्रमा निगरानी कडा पारिएको छ।
