वीरगंज । राष्ट्रिय स्वतन्त्र पार्टी मधेस प्रदेशकी संस्थापक सभापति तथा हाल केन्द्रीय महिला तथा सामाजिक विकास विभागकी सदस्य ममता शर्मा ले पार्टीको साधारण सदस्यसमेत नरहने गरी राजीनामा दिएकी छन्।
शर्माले २०७९ साल श्रावण १० गतेदेखि पार्टीप्रति निस्वार्थ भावले आफ्नो योग्यता, क्षमता, दक्षता र समय समर्पण गर्दै निरन्तर योगदान पुर्याउँदै आएको उल्लेख गरेकी छन्। “राजनीतिमा युवा पुस्ताको सहभागिता बढाउनुपर्छ” र “जान्नेलाई छान्ने” भन्ने मूल नाराबाट प्रेरित भई आफू पार्टीमा आबद्ध भएको बताउँदै उनले आसन्न फागुन २१ गतेको निर्वाचन सन्दर्भमा पार्टीले अवलम्बन गरेको पद्धति, निर्णय प्रक्रिया र कार्यशैली स्थापनाकालीन मूल्य, विधान तथा सार्वजनिक प्रतिबद्धतासँग मेल नखाने अनुभव भएको जनाएकी छन्।
उनका अनुसार संगठनमा दिनरात खटिएका सक्षम समर्थक तथा कार्यकर्ताको योगदानको उचित मूल्यांकन हुन नसक्नु, विधि र विधानविपरीत गतिविधिहरू हुनु, पार्टीका सिद्धान्तहरू व्यवहारमा कार्यान्वयन नहुनु तथा निर्णय प्रक्रियामा आर्थिक अनियमितताको प्रभाव देखिनुले आफू गम्भीर रूपमा असन्तुष्ट भएको बताएकी छन्।
“यी सबै क्रियाकलापहरूको साक्षी बनेर मौन रहिरहनु मेरो आत्मसम्मान र राजनीतिक मूल्यहरूप्रति अन्याय हुने ठहरसहित आजकै मितिदेखि लागू हुने गरी पार्टीको साधारण सदस्यसमेत नरहने गरी राजीनामा पेश गरेकी हुँ,” शर्माले वक्तव्यमा उल्लेख गरेकी छन्।
अन्त्यमा उनले पार्टीमा रहँदा पाएको अभिभावकत्व, सहकार्य र अवसरप्रति धन्यवाद ज्ञापन गर्दै भविष्यमा पनि लोकतान्त्रिक मूल्य, सुशासन र पारदर्शिताको पक्षमा रहने प्रतिबद्धता व्यक्त गरेकी छन्।
