वीरगंज । फागुन २१ गते हुने प्रतिनिधिसभा सदस्य निर्वाचन नजिकिँदै गर्दा पुराना दल परित्याग गरी नयाँ दलमा प्रवेश गर्ने क्रम तीव्र बन्दै गएको छ। यसै क्रममा पर्सागढी नगरपालिकामा दुई दर्जन युवाहरू नेपाली कांग्रेस परित्याग गरी राष्ट्रिय स्वतन्त्र पार्टी (रास्वपा) मा प्रवेश गरेका छन्।
मनवा बजारमा आयोजित पार्टी प्रवेश कार्यक्रम राष्ट्रिय स्वतन्त्र पार्टी पर्सागढी नगरपालिका सभापति कवि अर्यालको अध्यक्षतामा सम्पन्न भएको थियो। कार्यक्रममा रास्वपाका नेता चन्द्रभुषण सिंहले नवप्रवेशी युवाहरूलाई पार्टीमा स्वागत गरेका हुन्।
पार्टीमा प्रवेश गर्नेहरूमा पर्सागढी नगरपालिका युवा समाजसेवी रविशंकर दास चौधरी, वडा नम्बर–९ का नेपाली कांग्रेसका वडाध्यक्षका प्रत्यासी निरज चौधरी, भूतपूर्व प्रहरी रामाधारी यादव, समाजसेवी मीनबहादुर भण्डारी लगायत रहेका छन्।
कार्यक्रमलाई सम्बोधन गर्दै नेता सिंहले फागुन २१ गतेको निर्वाचनपछि देशमा बालेन शाहको नेतृत्वमा सरकार बन्ने दाबी गर्दै सो सरकारले देशमा सुशासन र परिवर्तनको नयाँ अध्याय सुरु गर्ने विश्वास व्यक्त गरे।
