वीरगंज । पर्साको कलिकामाई गाउँपालिका वडा नम्बर ५ सेमरा टोलमा आउँदो फाल्गुन ६ गतेदेखि हुने विष्णु महायज्ञमा दलित समुदायलाई पूजा कार्यक्रममा सरिक नगराइएको आरोप लागेपछि स्थानीय दलितहरू आक्रोशित भएका छन्।
दलित अगुवा कमलेश पासवान का अनुसार महायज्ञमा २५ जना पूजा बस्ने निर्णय भएपछि दलित समुदायबाट ५ जनाको नाम प्रस्ताव गरिएको थियो। तर, ती नाम समावेश नगरिएपछि विवाद सिर्जना भएको उनले बताए।
स्थानीय दलित समुदायले आफूहरू पनि हिन्दू धर्मावलम्बी भएको उल्लेख गर्दै नेपालका संविधानले जातीय विभेदलाई दण्डनीय व्यवस्था गरेको स्मरण गराएका छन्। यज्ञका सभापतिसहित आयोजक पक्षले पूजा बसाउन नमानेपछि जिल्ला प्रशासन कार्यालयमा उजुरी दर्ता गरिएको जनाइएको छ।
दलित अगुवाहरूका अनुसार यज्ञका सभापति जयबालकसहित सम्बन्धित व्यक्तिविरुद्ध उजुरी परेको छ। यद्यपि, समस्या समाधानका लागि हालसम्म कुनै प्रभावकारी पहल नभएको र आफूहरू यज्ञबाट वञ्चित हुने अवस्था देखिएको उनीहरूको गुनासो छ।
स्थानीय बासिन्दाहरूले कानुन कार्यान्वयन र सामाजिक सद्भाव कायम गर्न सम्बन्धित निकायले चासो दिनुपर्ने बताएका छन्। जातीय विभेदसम्बन्धी विषयमा प्रशासन मौन बस्नु दुःखद भएको उनीहरूको भनाइ छ।
