वीरगंज । पर्साको कालिकामाई गाउँपालिका कार्यालयमा सि.अ.हे.व. अधिकृत (छैठौं) तहमा कार्यरत तथा गाउँपालिकाका स्वास्थ्य संयोजक योगेन्द्र प्रसाद चौरसियाको स्वेच्छिक राजिनामा स्वीकृत भएको छ ।
गाउँपालिकाका प्रमुख प्रशासकीय अधिकृत राज कुशवाहाका अनुसार चौरसियाले दिएको राजिनामा माघ २९ गते बिहीबारदेखि लागू हुने गरी स्वीकृत गरिएको हो । चौरसियाले माघ १२ गते नै प्रमुख प्रशासकीय अधिकृत कुशवाहा समक्ष लिखित रूपमा राजिनामा पेश गरेका थिए ।
बुझाएको राजिनामापत्रमा उनले स्वास्थ्य सेवा समूह हे.ई. तह अन्तर्गत सि.अ.हे.व. अधिकृत पदमा वि.सं. २०५३/०५/२५ गते स्थायी नियुक्ति पाएदेखि हालसम्म निरन्तर तथा अविछिन्न रूपमा सेवा गर्दै आएको उल्लेख गरेका थिए । साथै, घरायसी समस्याका कारण सेवामा निरन्तरता दिन नसक्ने अवस्था आएको जनाउँदै आफ्नो इच्छाअनुसार खुसीराजीका साथ राजिनामा दिएको स्पष्ट पारेका छन् ।
यद्यपि, स्रोतका अनुसार चौरसिया लामो समयदेखि राजनीतिमा सक्रिय हुने तयारीमा थिए । उनी राष्ट्रिय स्वतन्त्र पार्टी (रास्वपा) मा आबद्ध भई आगामी स्थानीय तह निर्वाचनमा कालिकामाई गाउँपालिकाको अध्यक्ष पदमा उम्मेदवारी दिने तयारीमा रहेको बताइएको छ ।
