वीरगंज । वीरगंज महानगरपालिका वडा नं. १० मा अवस्थित माउन्ट मकालु माध्यमिक विद्यालयको तीनदिने आन्तरिक खेलकुद प्रतियोगिता सोमबार सम्पन्न भएको छ । प्रतियोगिताको अन्तिम तथा तेस्रो दिन एलकेजी र नर्सरी कक्षाका विद्यार्थीहरूबीच विभिन्न खेलकुद गतिविधि आयोजना गरिएको विद्यालयका प्रधानाध्यापक राहुल श्रीवास्तवले जानकारी दिए ।
प्रतियोगितामा सहभागी भई उत्कृष्ट प्रदर्शन गर्ने विद्यार्थीहरूलाई विद्यालयका संस्थापक कामेश्वर प्रसाद श्रीवास्तव, उप–प्रधानाध्यापिका रेखा जैसी तथा विद्यालयका शिक्षक–शिक्षिकाहरूले पुरस्कार तथा प्रमाणपत्र प्रदान गरेका थिए ।
पुरस्कार वितरण समारोहलाई सम्बोधन गर्दै विद्यालयका संस्थापक श्रीवास्तवले खेलकुदले विद्यार्थीहरूमा अनुशासन, सहकार्य र आत्मविश्वास विकास गर्ने बताए । उनले खेलकुद शारीरिक मात्र नभई मानसिक विकासका लागि पनि अत्यन्त आवश्यक रहेको उल्लेख गर्दै विद्यार्थीहरूको सर्वाङ्गीण विकासमा खेलको महत्वपूर्ण भूमिका रहने धारणा व्यक्त गरे ।
विद्यालय प्रशासनका अनुसार यस्ता खेलकुद कार्यक्रमहरूले विद्यार्थीहरूलाई सिकाइसँगै व्यवहारिक जीवनका लागि तयार पार्न सहयोग पुग्ने विश्वास लिइएको छ ।
