जनकपुरधाम । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र साह (बालेन)ले देश विकासका लागि आफ्नो पार्टीलाई विजयी गराउन आग्रह गर्नुभएको छ।
रास्वपाद्वारा आज जनकपुरधाममा आयोजित परिवर्तन उद्घोषसभालाई सम्बोधन गर्दै उहाँले प्रतिनिधिसभा निर्वाचनमा पार्टीलाई बहुमतले विजयी गराई मधेस र देशको सेवा गर्ने अवसर दिन अपिल गर्नुभयो।
वरिष्ठ नेता साहले प्रतिनिधिसभामा रास्वपा विजयी भए देशले ठूलो उपलब्धि हासिल गर्ने दाबी गर्दै आफ्नो पार्टीको सरकार बनेमा नागरिकले आफ्ना अधिकार आफ्नै प्रदेशमा पाउने आधार थप बलियो हुने धारणा राख्नुभयो।
“म काम गर्ने मानिस हुँ, मलाई काम गर्ने मौका दिनुस्। काठमाडौं महानगरपालिकाको प्रमुख हुँदा गरेका कामबारे यहाँहरूले थाहा पाउनुभएको नै छ। प्रतिनिधिसभामा हाम्रो पार्टीलाई निर्वाचित गर्नुभयो भने मधेसमा पनि काम गरेर देखाउने छु, यो मेरो प्रतिज्ञा हो,” उहाँले भन्नुभयो।
मधेस प्रदेशको राजधानी जनकपुरधाम ऐतिहासिक तथा धार्मिक स्थल भए पनि अपेक्षित विकास नदेखिएकोप्रति चिन्ता व्यक्त गर्दै साहले सरसफाइको अभाव र कमजोर पूर्वाधारका कारण पर्यटनसमेत प्रभावित भएको बताउनुभयो। “यो ऐतिहासिक भूमि हो, तर सरसफाइको कमीले जनकपुर प्रदूषित बन्दै गएको छ। पर्याप्त विकास नहुँदा पर्यटकलाई समेत कठिनाइ भइरहेको छ,” उहाँले भन्नुभयो।
आफू र आफ्नो पार्टी विजयी भए जनकपुरसहित मधेसको विकासमा विशेष ध्यान दिने र प्रदेशका नागरिकले अधिकारका लागि काठमाडौं धाउनुपर्ने बाध्यात्मक अवस्थाको अन्त्य गर्न पहल गर्ने उहाँको प्रतिबद्धता थियो। “हाम्रो सरकार बनेमा प्रदेशलाई अझ बलियो, सशक्त र प्रभावकारी बनाउनेछौँ,” उहाँले जोड दिनुभयो।
मधेसकै बासिन्दा भएकाले यस क्षेत्रको समग्र विकासका लागि सम्पूर्ण ध्यान केन्द्रित गर्ने प्रतिबद्धतासमेत वरिष्ठ नेता साहले व्यक्त गर्नुभयो।
