वीरगंज । राष्ट्रिय स्वतन्त्र पार्टी (रास्वपा) मा नेपाली कांग्रेस र जनता समाजवादी पार्टी (जसपा) का प्रभावशाली नेताहरू प्रवेशकाे खबरसँगै पर्साको राजनीतिक माहोल तातेको छ।
रास्वपाले सार्वजनिक गरेको सम्भावित उम्मेदवारहरूको सूचीमा कांग्रेस पर्साका पूर्व सभापति अजय द्विवेदी र जसपाबाट निर्वाचित वीरगंज महानगरपालिका वडा नं. १० का वडाध्यक्ष सुशील साह कानुको नाम देखिएपछि पार्टीभित्रै समेत हलचल बढेको हो।
आगामी फागुन २१ गते हुने प्रतिनिधि सभा निर्वाचनलाई लक्षित गर्दै द्विवेदीले पर्सा निर्वाचन क्षेत्र नं. १ बाट र कानुले पर्सा निर्वाचन क्षेत्र नं. २ बाट चुनाव लड्ने योजना अन्तर्गत रास्वपामा प्रवेश गरेको बुझिएको छ।
कांग्रेस नेता द्विवेदी र जसपा नेता कानु दुवै आ–आफ्नो राजनीतिक पहुँच र लबिङका आधारमा रास्वपाबाट टिकट सुरक्षित गर्न सक्रिय देखिएका छन्। उनीहरू पार्टी प्रवेशसँगै सम्भावित उम्मेदवार सूचीमा परेपछि पर्सामा नयाँ राजनीतिक समीकरणको चर्चा सुरु भएको छ।
पर्सा निर्वाचन क्षेत्र नं. १ बाट रास्वपाका जिल्ला अध्यक्ष बुद्धि प्रसाद पन्त (हरी पन्त) पनि चुनाव लड्ने तयारीमा छन्। तर बालेन साह समूहबाट अजय द्विवेदीले पनि सोही क्षेत्रबाट उम्मेदवारी दिने तयारी गरेपछि टिकट कसले पाउने भन्ने विषयमा अन्योल सिर्जना भएको छ।
यस्तै, पर्सा निर्वाचन क्षेत्र नं. २ मा जिल्ला कार्यसमितिले प्रबेज अख्तरलाई उम्मेदवारका रूपमा अघि सारे पनि जसपाबाट रास्वपा प्रवेश गरेका वडाध्यक्ष सुशील साह कानुलाई समेत बालेन पक्षबाट सिफारिस गरिएको बताइएको छ।
यस विषयमा प्रतिक्रिया लिन अजय द्विवेदी र सुशील साह कानुसँग फोनमार्फत सम्पर्क गर्ने प्रयास गरिए पनि सम्पर्क हुन सकेन।
