वीरगंज । पर्साको सखुवाप्रसौनी गाउँपालिकाको आयोजनामा गाउँ कार्यपालिकाको कार्यालयमा गाउँसभाको १६औँ अधिवेशन सम्पन्न भएको छ। अधिवेशन गाउँपालिका अध्यक्ष यसवन्त यादवको अध्यक्षतामा सम्पन्न भएको हो।
अधिवेशनमा गाउँपालिका उपाध्यक्ष शर्मिला बिष्ट महतो, प्रमुख प्रशासकीय अधिकृत संजीव कुमार यादवसहित वडा नं. १ का अध्यक्ष बसुदेव महतो थारु, वडा नं. २ का अध्यक्ष चिरञ्जीवी महतो थारु, वडा नं. ३ का प्रतिनिधि मोजामिल अन्सारी, वडा नं. ४ का अध्यक्ष मोहम्मद आरिफ अन्सारी, वडा नं. ५ का अध्यक्ष अशेश्वर यादव तथा वडा नं. ६ का अध्यक्ष मुन्ना कमकरलगायतको उपस्थिति रहेको थियो।
अधिवेशनको उद्घाटन गर्दै गाउँपालिका अध्यक्ष यादवले स्थानीय सरकार जनताको प्रत्यक्ष सहभागिता र आवश्यकताअनुसार योजना निर्माण तथा कार्यान्वयनमा प्रतिबद्ध रहेको बताउनुभयो। उहाँले पारदर्शिता, सुशासन र विकासलाई प्राथमिकतामा राख्दै गाउँपालिकालाई समृद्ध बनाउने लक्ष्य रहेको उल्लेख गर्नुभयो।
उपाध्यक्ष शर्मिला बिष्ट महतोले सामाजिक विकास, महिला, बालबालिका तथा विपन्न वर्गको सशक्तीकरणमा केन्द्रित कार्यक्रमलाई निरन्तरता दिइने बताउँदै गाउँसभाबाट पारित नीति तथा योजनाले स्थानीय तहमा सकारात्मक परिवर्तन ल्याउने विश्वास व्यक्त गर्नुभयो।
प्रमुख प्रशासकीय अधिकृत संजीव कुमार यादवले आर्थिक अनुशासन, प्रभावकारी सेवा प्रवाह तथा जनमुखी प्रशासन सञ्चालनमा गाउँपालिका सचेत रहेको बताउनुभयो। उहाँले जनप्रतिनिधि र कर्मचारीबीचको सहकार्यबाट मात्र विकास लक्ष्य हासिल गर्न सकिने धारणा राख्नुभयो।
अधिवेशनमा विभिन्न वडाध्यक्षहरूले आ–आफ्ना वडाका समस्या, आवश्यकता र प्राथमिकताबारे धारणा राख्दै शिक्षा, स्वास्थ्य, सडक, खानेपानी तथा रोजगारी सिर्जनामा जोड दिनुपर्ने सुझाव प्रस्तुत गरेका थिए।
आगामी आर्थिक वर्षका नीति, कार्यक्रम तथा बजेटसम्बन्धी विषयमा छलफल गरिएको यस अधिवेशनबाट पारित निर्णयहरूको प्रभावकारी कार्यान्वयनमार्फत स्थानीय जनताको जीवनस्तर उकासिने अपेक्षा गरिएको आयोजकले जनाएको छ।
