वीरगंज । सशस्त्र प्रहरी बल नेपाल गुल्म लहावरथकरीको आयोजनामा मंगलबार सशस्त्र प्रहरी बल नेपाल लहावरथकरी र भारत बिहारस्थित एसएसबी सेँवरियाको टिमबीच मैत्रीपूर्ण भलिबल प्रतियोगिता सम्पन्न भएको छ। प्रतियोगितामा भारतको सेँवरिया एसएसबी टिम विजयी भएको छ।
प्रतियोगितामा कुल तीन खेल खेलाइएको थियो। पहिलो खेलमा सशस्त्र प्रहरी बल नेपाल लहावरथकरीले जित हासिल गरेको थियो भने त्यसपछि भएका दुई खेलमा भारतको एसएसबी सेँवरियाले विजय हात पार्दै समग्रमा २–१ को जित दर्ता गर्यो।
विजेता टोलीलाई लहावरथकरी गुल्मका गणपति डीएसपी लोकनाथ उप्रेतीले पुरस्कार वितरण गरेका थिए भने उपविजेता टोलीलाई डीएसपी दीपक चव्हाणले मेडल वितरण गरेका थिए।
२५ औं सशस्त्र प्रहरी दिवसको उपलक्ष्यमा आयोजना गरिएको उक्त मैत्रीपूर्ण भलिबल प्रतियोगिताले नेपाल–भारतबीचको आपसी सद्भाव, समन्वय र मित्रतालाई थप मजबुत बनाएको आयोजकले जनाएको छ।
कार्यक्रममा पकहाँ मैनपुर गाउँपालिका वडा नं. ५ का वडाध्यक्ष बलिराम चौरसिया, पत्रकार छठु साह, वडा सदस्य पप्पू गिरी, भीखनपुरका डीएसपीलगायतको उपस्थिति रहेको थियो।
