वीरगंज । सशस्त्र प्रहरी बल नेपाल सीमा सुरक्षा गुल्म हेडक्वार्टर लहावरथकरीको आयोजनामा सञ्चालन गरिएको ७ दिने केश कटाइ (हेयर कटिङ) तालिम सम्पन्न भएको छ।
पकहाँ मैनपुर गाउँपालिका–४ लहावरथकरीस्थित सीमा सुरक्षा गुल्म लहावरथकरीमा सञ्चालित तालिमको समापन समारोहलाई सम्बोधन गर्दै सशस्त्र प्रहरी बल नेपाल नं. १३ गण हे.क्वा. पर्साका गणपति प्रहरी उपरीक्षक (एसपी) पुरन चन्द्र भट्टले बेरोजगार युवालाई स्वरोजगारतर्फ उन्मुख गराउने तथा सीमाक्षेत्रमा हुने तस्करी र अपराध नियन्त्रण गर्ने उद्देश्यले यस्ता सिपमूलक तालिम सञ्चालन गरिएको बताए।
उनले सीमाक्षेत्रमा सामाजिक, आर्थिक तथा लागूऔषधसम्बन्धी अपराधको चुनौती रहेको उल्लेख गर्दै त्यसलाई निरुत्साहित गर्न सिपमूलक तालिम प्रभावकारी माध्यम हुने बताए। “हाम्रो मुलुकको ठूलो समस्या बेरोजगारी हो । सिप भए स्वदेशमै रोजगारी गरेर परिवारसँग बस्न सकिन्छ । सिप कहिल्यै खेर जाँदैन,” उनले भने ।
सीमा सुरक्षा गुल्म लहावरथकरीका गणपति प्रहरी नायब उपरिक्षक (डिएसपी) लोकनाथ उप्रेतीले सशस्त्र प्रहरी र स्थानीय नागरिकबीच समन्वय तथा सहकार्य बढाउने उद्देश्यले तालिम आयोजना गरिएको जानकारी दिए । उनले तालिममा सहभागी १५ जनाले व्यवहारिक सिप हासिल गरी आत्मनिर्भर बन्ने आधार तयार भएको बताए ।
समापन समारोहमा सीमा सुरक्षा समितिका संयोजकसमेत रहेका पकहाँ मैनपुर–४ का वडाध्यक्ष ढेडी यादव, पकहाँ मैनपुर–५ का वडाध्यक्ष बलिराम चौरसिया, पत्रकार छठु साह, वडा समिति सदस्य पप्पू गिरी, प्रभु पटेल लगायतले मन्तव्य राख्दै सशस्त्र प्रहरीको पहलको प्रशंसा गरे ।
२५औँ सशस्त्र प्रहरी दिवस २०८२ को अवसरमा आयोजित उक्त सिपमूलक केश कटाइ तालिममा प्रशिक्षक सुकदेव ठाकुर हजाम, सुनिल ठाकुर हजार, धर्मेन्द्र पटेल र कुलदिप पाण्डेले प्रशिक्षण दिएका थिए। समापन समारोहमा तालिमका सहभागीलाई प्रमाणपत्र तथा केश काट्ने सामग्रीसमेत वितरण गरिएको थियो ।
