सेढवा । पर्सा जिल्लाको जीराभवानी गाउँपालिका र ठोरी गाउँपालिकाका शिक्षकहरूबीच सम्पन्न मैत्रीपूर्ण फुटबल प्रतियोगितामा ठोरी गाउँपालिका विजयी भएको छ ।
शुक्रबार ठोरी गाउँपालिका–४ स्थित विजयवस्ती खेल मैदानमा आयोजित प्रतियोगितामा ठोरी गाउँपालिकाले जीराभवानी गाउँपालिकालाई ३–१ गोल अन्तरले पराजित गर्दै जीत हात पारेको हो ।
प्रतियोगितामा विजेता बनेको ठोरी गाउँपालिकाले नगद २० हजार रुपैयाँ पुरस्कार प्राप्त गरेको छ । पुरस्कार रकम जीराभवानी गाउँपालिकाका नेपाल शिक्षक महासंघका अध्यक्ष कृपासिन्धु प्रसाद चौधरीले विजयी टोलीलाई हस्तान्तरण गर्नुभएको थियो ।
पुरस्कार वितरण कार्यक्रममा ठोरी गाउँपालिकाका शिक्षा प्रमुख भूपाल कुमार जोशी, नेपाल शिक्षक महासंघ ठोरीका अध्यक्ष अमृत श्रेष्ठलगायत शिक्षक, खेलाडी तथा अन्य सरोकारवालाहरूको उपस्थिति रहेको थियो ।
मैत्रीपूर्ण फुटबल प्रतियोगिताले शिक्षकहरूबीच आपसी सद्भाव, सहकार्य र शारीरिक स्वास्थ्यप्रति सचेतना अभिवृद्धि गर्न महत्वपूर्ण योगदान पुगेको सहभागीहरूले बताएका छन् ।
