वीरगंज । सशस्त्र प्रहरी बल, नेपाल नं. १३ गण हे.क्वा. पर्साले सीमावर्ती क्षेत्रमा लागुऔषध ओसारपसार नियन्त्रण गर्ने अभियानलाई तीव्र बनाउँदै ९ केजी ३०० ग्राम प्रतिबन्धित लागुऔषध गाँजा सहित दुई जनालाई नियन्त्रणमा लिएको छ।
सशस्त्र प्रहरी बल, नेपाल प्रधान कार्यालय तथा नं. २ छिन्नमस्ता बाहिनीको नीति तथा निर्देशनअनुसार पर्सा जिल्लामा लागुऔषध ओसारपसार नियन्त्रणलाई अभियानकै रूपमा सञ्चालन गर्दै आएको सशस्त्र प्रहरीले नियमित गस्ती र कडा निगरानीमार्फत सीमा अपराध नियन्त्रणमा सक्रियता बढाएको जनाएको छ।
सोही क्रममा शनिबार पर्साको पटेर्वासुगौली गाउँपालिका–५ मनिहर्वा चोकमा सुरक्षा बेस पोखरीयाबाट सशस्त्र प्रहरी नायब उपरीक्षक शम्भु कटुवालको कमाण्डमा खटिएको मोबाइल गस्ती टोलीले चेकपोइन्ट राखी सवारी साधन चेकजाँच गरेको थियो। चेकजाँचका क्रममा नेपालबाट भारततर्फ लैजाँदै गरेको दुई वटा भारतीय नम्बर प्लेटका मोटरसाइकलबाट लागुऔषध गाँजा बरामद गरिएको सशस्त्र प्रहरीले जनाएको छ ।
पकाहाँ मैनपुर गाउँपालिका–५ सबैठवा निवासी अन्दाजी ४३ वर्षीय रबिन्द्र महतो सवार बिआर२२यु ११७८ नम्बरको मोटरसाइकलको डिकीभित्र लुकाइछिपाइ राखिएको करिब ५ केजी गाँजा तथा भारतको बेतिया जिल्ला बेहरा झुम्का–१४ निवासी अन्दाजी ३७ वर्षीय अशोक महतो सवार बिआर२२ए ५३०२२ नम्बरको मोटरसाइकलको सिटमुनि लुकाइ राखिएको करिब ४ केजी ३०० ग्राम गाँजा फेला परेको सशस्त्र प्रहरी उपरीक्षक पुरन चन्द्र भट्टले जानकारी दिए ।
उनका अनुसार बरामद गरिएको गाँजा, दुवै मोटरसाइकल, दुई थान मोबाइल फोन तथा भारतीय रुपैयाँ १ हजार ४ सय ५० सहित उनीहरूलाई नियन्त्रणमा लिई आवश्यक कारबाहीका लागि इलाका प्रहरी कार्यालय पटेर्वासुगौलीमा बुझाइएको छ।
यसअघि पनि सशस्त्र प्रहरी बल, पर्साले विभिन्न समयमा जिल्लाका विभिन्न स्थानबाट ठूलो परिमाणमा लागुऔषध बरामद गर्दै आएको छ। गत मंसिर महिनामा मात्रै ३२३ केजी गाँजा, पुस ९ गते १२० केजी गाँजा तथा पुस १० गते ७३८ फायल नाइट्राभेट बरामद गरी नेपाल प्रहरीलाई बुझाइएको थियो।
सशस्त्र प्रहरी बल, पर्साले सीमावर्ती क्षेत्रमा हुने लागुऔषध तथा अवैध कारोबार नियन्त्रणका लागि सुरक्षा परिचालनलाई अझ प्रभावकारी बनाउँदै लैजाने प्रतिबद्धता व्यक्त गरेको छ।
