वीरगंज । पर्साको धोबिनी गाउँपालिकामा सोमबार शिक्षक सम्मान कार्यक्रम सम्पन्न भएको छ । गाउँपालिका अध्यक्ष मदन प्रसाद चौहानको अध्यक्षतामा आयोजित कार्यक्रममा श्री अजिज मियाँ माध्यमिक विद्यालय, धोबिनीका प्रधानाध्यापक जितेन्द्र रामलाई विशेष सम्मान प्रदान गरिएको हो ।
कार्यक्रममा शिक्षकलाई समानस्वरूप बैग वितरण गरिएको थियो भने प्रधानाध्यापक रामलाई उत्कृष्ट शिक्षकको रूपमा नगद २५ हजार रुपैयाँसहित दोसल्ला ओढाएर सम्मान गरिएको छ । राम यसअघि २०८२ असार महिनामा मधेस प्रदेश सरकारबाट “एक पालिका एक उत्कृष्ट शिक्षक” पुरस्कार तथा प्रजापति प्रसाई (पी.पी. प्रसाई फाउन्डेसन) पुरस्कारबाट समेत सम्मानित भइसकेका छन् ।
विद्यालयप्रति देखाएको लगनशीलता, शिक्षण पेशाप्रति कर्मठता र शैक्षिक सुधारमा पुर्याएको योगदानको कदर गर्दै गाउँपालिकाले उनलाई नगद २५ हजार रुपैयाँसहित सम्मान गरेको अध्यक्ष चौहानले बताए ।
कार्यक्रममा गाउँपालिका अध्यक्ष मदन प्रसाद चौहान, उपाध्यक्ष मन्जु देवी, प्रमुख प्रशासकीय अधिकृत कृष्ण प्रसाद खतिवडा, वडा अध्यक्षहरू बन्धु शाह तेली, दबेन्द्र प्रसाद कुर्मी, राजकिशोर पटेल, अबास मियाँ चुरिहार, मनौर अहमद, शिक्षा शाखा प्रमुख जितेन्द्र प्रसाद चौहान, शिक्षक महासंघका अध्यक्ष एम. आरिफ अन्सारी, कार्यपालिका सदस्यहरू, शिक्षा प्रेमी धुरुप साह, सरोज पटेल लगायतको उपस्थिति रहेको थियो ।
पुरस्कृत प्रधानाध्यापक जितेन्द्र रामले आफूले प्राप्त गरेको नगद पुरस्कार राशि २५ हजार रुपैयाँ विद्यालयलाई नै सहयोग गर्ने घोषणा गरेका छन् । उक्त रकम भोलि नै विद्यालय व्यवस्थापन समितिका अध्यक्षलाई हस्तान्तरण गर्ने जानकारी उनले कालिका टाइम्सलाई दिएका छन् ।
