वीरगंज । सशस्त्र प्रहरी बल, नेपाल नं. १३ गण हे.क्वा., पर्साको विशेष सूचनाका आधारमा सीमा सुरक्षा गुल्म वीरगंज र वीरगंज भन्सार कार्यालयबाट खटिएको संयुक्त टोलीले भन्सार छली गरी भण्डारण गरिएको १५० क्यारेट केरा नियन्त्रणमा लिएको छ ।
वीरगंज महानगरपालिका–१५ स्थित भिष्वा, एन.एम.सी. रोडमा रहेको मनिष फ्रुट सप्लायर्सको गोदाममा सम्भु कुमार गुप्ताले भारतबाट अवैध रूपमा ल्याई राखेको अवस्थामा उक्त केरा फेला परेपछि टोलीले आवश्यक कारबाहीका लागि वीरगंज भन्सार कार्यालयमा बुझाएको हो।
नेपालका किसानहरूले उत्पादन गरेका कृषिजन्य उपजको उचित मूल्य नपाएको, तर भारतबाट आयात हुने फलफूल तथा तरकारीहरूले बजार ओगटिरहेको गुनासो बढिरहेको बेला सशस्त्र प्रहरी बलले अवैध व्यापार तथा भन्सार छली रोक्ने कार्यलाई थप कडाइका साथ अगाडि बढाएको सशस्त्र प्रहरी बल पर्साले जानकारी दिएको छ।
सीमा क्षेत्रमा चोरी–तस्करी तथा अन्य सीमा अपराध नियन्त्रणलाई अभियानकै रूपमा सञ्चालन गरिरहेको सशस्त्र प्रहरी बल नेपाल पर्साले आगामी दिनमा यो अभियानलाई अझ प्रभावकारी रूपमा अघि बढाउँदै राजस्व अभिवृद्धिमा टेवा पुर्याइने सशस्त्र प्रहरी बल, नेपाल नं. १३ गण, हे.क्वा. पर्साका प्रहरी नायब उपरिक्षक विश्वराज योन्जनले जानकारी दिए ।
