वीरगंज । वीरगंज महानगरपालिका–३०, लालपर्सास्थित श्री नेपाल राष्ट्रिय माध्यमिक विद्यालयलाई जनमत पार्टी पर्साले चार थान डेस्क–बेन्च उपलब्ध गराएको छ। लोककल्याणकारी अभियान अन्तर्गत विद्यालयमा देखिएको आवश्यकता पहिचान भएपछि अध्यक्ष ओमप्रकाश सर्राफको पहलमा डेस्क–बेन्च हस्तान्तरण गरिएको जनमत पार्टी पर्साले जनाएको छ।
स्कूल व्यवस्थापन समिति अध्यक्ष ध्रुप महतोको अध्यक्षतामा सम्पन्न हस्तान्तरण कार्यक्रममा जनमत पार्टी पर्साका अध्यक्ष ओमप्रकाश सर्राफ, क्षेत्रीय संयोजक डा. मनोज सर्राफ, जिल्ला सदस्य नागेन्द्र गुप्ता, नागेन्द्र यादव, उपाध्यक्ष निरन्जन कुशवाहा, युवा नेता राजन मण्डल र अनिल शर्मा लगायत स्थानीय भद्रभलाद्मी तथा शिक्षक–शिक्षिकाहरूको उपस्थिति रहेको थियो। विद्यालयका प्रधानाध्यापक हेम बहादुर आचार्यले स्वागत मन्तव्य राखेका थिए।
कार्यक्रमलाई सम्बोधन गर्दै अध्यक्ष सर्राफले शिक्षालाई समाज रूपान्तरणको मूल आधार भएको बताउँदै विद्यालयको वातावरण सुधारका लागि समुदाय, स्थानीय सरकार र राजनीतिक दलहरूको संयुक्त प्रयास आवश्यक रहेको उल्लेख गरे। “मधेस प्रदेशको शैक्षिक सूचकांक अन्य प्रदेशको तुलनामा कमजोर हुनु चिन्ताको विषय हो,” उनले भने, “यस्तो अवस्थामा सबै पक्षले विद्यालयलाई सबल बनाउन हातेमालो गर्नुपर्छ।”
सर्राफले आधारभूत शैक्षिक पूर्वाधारको कमीले विद्यार्थीको सिकाइमा प्रत्यक्ष असर पर्ने भएकाले जनमत पार्टी पर्साले आफ्नै स्तरबाट निरन्तर सहयोग गर्दै आएको बताए। “हामीले गरेको सहयोग सानो भए पनि विद्यालयको सुधारमा उपयोगी बन्ने विश्वास छ,” उनले जोड दिए।
