सेढवा । पर्साको ग्रामीण क्षेत्रमा रहेका खोलाहरूको अनधिकृत रूपमा दोहन भइरहेको भन्दै स्थानीयवासीले कडा आपत्ति जनाएका छन्। जिराभवानी गाउँपालिका–५ स्थित भलूवाही खोलाबाट दैनिक रूपमा ठूलो मात्रामा नदिजन्य पदार्थ उत्खनन भइरहेको स्थानीयको आरोप छ।
स्थानीयका अनुसार विभिन्न समूहले दैनिक सयभन्दा बढी ट्रलर बालुवा–गिटी उत्खनन गरी जिराभवानी, पटेर्वा सुगौली, जगरनाथपुर र धोबिनी गाउँपालिकाका विभिन्न स्थानमा पुर्याउँदै आएका छन्। उत्खननमा संलग्न समूहले राज्यको राजस्व छली गर्दै यस क्षेत्रका प्रहरी एकाइलाई मासिक ‘महिनावारी नजराना’ बुझाएर नदिजन्य पदार्थ तस्करीलाई संरक्षण दिइरहेको आरोपसमेत छ।
यसबारे जिराभवानी गाउँपालिकाको राजस्व शाखाका प्रमुख सरोज दासले प्रत्येक दुई वर्षमा वातावरणीय मूल्यांकन (EIA/IEE) प्रतिवेदन तयार गरी माथिल्लो निकायमा पेश गरेपछि मात्र उत्खननका लागि ठेक्का सिफारिस गर्ने कानुनी व्यवस्था रहेको स्पष्ट पारे । उनका अनुसार प्रतिवेदन तयार गर्ने प्रक्रिया हालैदेखि चलिरहेको छ र चाँडै टेन्डर आह्वान गरिने तयारी छ।
