वीरगञ्ज । नेकपा एमालेबाट निर्वाचित पर्साको सखुवा प्रसौनी गाउँपालिकाका अध्यक्ष यशवन्त यादवले पार्टीभित्रका भ्रष्ट र कमिसनखोरहरूलाई कडा चेतावनी दिएका छन्। उनले पूर्व सङ्घीय मामिला तथा सामान्य प्रशासन मन्त्री राजकुमार गुप्तालाई लक्षित गर्दै भने, “एमालेमा भ्रष्ट र कमिसनखोरका लागि कुनै ठाउँ छैन।”
मङ्गलवार सखुवा प्रसौनी गाउँपालिकाको एकडेरवा टोलमा सम्पन्न एमालेको गाउँपालिका स्तरीय जनसभा कार्यक्रममा बोल्दै अध्यक्ष यादवले पार्टीको सिद्धान्त र आचारसंहिता विपरीतका क्रियाकलाप सहन नसकिने बताए।
उनको वक्तव्य हाल पर्सा निर्वाचन क्षेत्र नम्बर ३ का पूर्व सांसदसमेत रहेका राजकुमार गुप्तामाथि लागेका भ्रष्टाचारका गम्भीर आरोपसँग जोडिएको देखिन्छ। यादवले स्पष्ट शब्दमा गुप्तालाई सम्बोधन गर्दै भने, “तपाईँ भ्रष्टाचारी हो, तपाईँको लागि एमालेमा कुनै ठाउँ छैन। सखुवा प्रसौनीलगायत पर्साका जनताले अब गुप्ताजस्ता व्यक्तिलाई अस्वीकार गर्नुपर्छ।”
यादवले अझ थप्दै भने, “यदि पार्टीले राजकुमार गुप्तालाई आगामी निर्वाचनमा टिकट दिने हो भने, हामी उनीविरुद्ध अभियान चलाउँछौँ।” उनले गुप्तालाई एमाले केन्द्रीय कमिटीबाट निलम्बन गरिएको दाबी गर्दै पार्टीभित्र शुद्धीकरणको आवश्यकता औँल्याए।
सभामा सहभागी स्थानीय नेताहरू र कार्यकर्ताहरूले समेत पार्टीभित्र अनुशासन र पारदर्शिता कायम गर्नुपर्नेमा जोड दिएका थिए।
