वीरगंज । सशस्त्र प्रहरी बल नेपाल, पर्साले भारतबाट अवैध रूपमा ल्याइँदै गरेको विभिन्न किसिमका औषधिसहित एक युवकलाई नियन्त्रणमा लिएको छ।
सशस्त्र प्रहरी नायब उपरीक्षक पुरुषोत्तम भण्डारीको कमाण्डमा खटिएको प्रहरी टोलीले शनिबार वीरगंज महानगरपालिका–१६, ईनर्वा नजिकको खेती इलाकाबाट एक युवकलाई नियन्त्रणमा लिएको हो । पक्राउ परेका व्यक्ति बारा जिल्ला, विश्रामपुर गाउँपालिका–४ बलिरामपुरका १८ वर्षीय हरिओम कुमार पासवान हुन् ।
उनी भारतबाट टाउकोमा बोकी नेपालतर्फ ल्याइरहेको अवस्थामा नियन्त्रणमा लिइएका हुन् । उनको साथबाट विभिन्न प्रकारका मानव उपभोगका औषधिहरू बरामद गरिएको सशस्त्र प्रहरी बलले जनाएको छ । बरामद औषधिको कुल मूल्य ९ लाख ५८ हजार ९१३ रुपैया बराबर रहेको बताइएको छ ।
पक्राउ परेका व्यक्ति र बरामद सामानलाई आवश्यक कानूनी कारबाहीका लागि वीरगंज भन्सार कार्यालय, पर्सामा बुझाइएको सशस्त्र प्रहरी बल नेपाल नं.१३ गण मुख्यालय, पर्साका सूचना अधिकारी प्रहरी नायब उपरिक्षक विश्वराज योन्जनले जानकारी दिए ।
