सेढवा । पर्साका किसानहरू वर्षे धानबाली पाकी सके पनि प्रतिकूल मौसमका कारण भित्र्याउन नसक्दा चिन्तामा परेका छन्। सोना मन्सुली, मनी मन्सुली, कतरनी र अन्य हाईब्रिड जातका धानबाली खेतमै थन्किएर बिग्रन थालेको किसानहरूले गुनासो गरेका छन्।
गण्डक नहरको उत्तरतर्फ रहेको थरुहट क्षेत्रका किसानहरूले एक साताभन्दा बढी समयदेखि धान पाके पनि कटनी गर्न नसकेको बताएका छन्। जिराभवानी गाउँपालिका–२ सेढवाका किसान बिरजु दास थारुका अनुसार छठ पर्वपछि अधिकांश किसान धान भित्र्याउन तयार भए पनि लगातार दुई दिनसम्म परेको वर्षा र हुरीका कारण काम रोकिएको हो।
“बिगत ४–५ दिनदेखि घाम लागे पनि खेतमा पानी नसुक्दा हार्भेस्टर मेशिन प्रयोग गर्न सकिएको छैन,” थारुले बताए। “मेशिन चलाउँदा भासिने जोखिम छ, जसले अर्को बाली रोप्न पनि असर पार्छ,” उनले चिन्ता व्यक्त गरे।
त्यस्तै, जगरनाथपुर गाउँपालिका–३ का किसान रामचन्द्र रामले भने खेतमा पानी जमेको र हुरीले धान ढलेर बालामै उम्रिन थालेकाले ठूलो नोक्सानीको जोखिम बढेको बताए। “मेशिन पस्दैन, ज्यामी राखौँ भने कामदार नै पाइँदैन,” उनले भने। “एक-दुई दिनमै बाली नभित्र्याए धान जमिनमा झर्ने अवस्था छ।”
धानको रोपाइँदेखि नै पानीको अभाव झेल्दै आएका किसानहरू अहिले बाली भित्र्याउने बेलामा फेरि मौसमी समस्याले मर्का खेपिरहेका छन्। लगातारको विपरीत मौसम र कटनीमा ढिलाइले उनीहरू आर्थिक रूपमा थप कमजोर बन्दै गएका छन्।
