वीरगंज । जिल्ला प्रहरी कार्यालय पर्सा र मातहत कार्यालयहरूले गत एक महिनामा अपराध नियन्त्रण, ट्राफिक व्यवस्थापन तथा जनसचेतनामूलक कार्यक्रमहरूमा उल्लेखनीय उपलब्धि हासिल गरेका छन् । पर्सा प्रहरी प्रमुखमा नयाँ प्रहरी उपरिक्षक सुदिप राज पाठक आएपछि असाेज महिनामा प्रहरीले अपराध नियन्त्रण र जनसेवामा उल्लेखनीय उपलब्धि हासिल गरेकाे हाे ।
जिल्ला प्रहरी कार्यालयले महिनाकाे अन्तिम दिन असाेज ३१ गते शुक्रबार एक महिना प्रतिवेदन सार्वजनि गरेकाे छ । सो अवधिमा प्राप्त निवेदन संख्या १०५ रहेको छ भने ८७ निवेदन फछ्यौट भएका छन् । हराएका ४३ जना व्यक्तिहरूमध्ये १२ जना फेला परेका छन् ।
जिल्ला प्रहरी कार्यालयका प्रवक्ता प्रहरी नायब उपरिक्षक हरि बहादुर बस्नेतका अनुसार एक महिनाकाे अवधिमा ट्राफिक व्यवस्थामा १०९२ सवारी साधनहरूलाई कारवाही गरिएको छ र राजस्व १२ लाख ९३ हजार ५ सय रुपैया संकलन भएको छ। यस अवधिमा ७२ सवारी दुर्घटना भएका छन् जसमा ६ जनाको मृत्यु र ९४ जना घाइते भएका छन् ।
भन्सार चोरी निकासीका सामानहरू रु. ६ करोड ८७ लाख ६२ हजार ३२१ मूल्यका बरामद गरिएको छ । फरार रहेका ७ जनालाई नियन्त्रणमा लिइएको छ । मादक पदार्थ नियन्त्रण अन्तर्गत ४३ के.जी. ९०० ग्राम गाँजा, ११ के.जी. चरेश र ३१ ग्राम ८८० मि.ग्राम खैरो हिरोईन बरामद गरिएको छ ।
जिल्ला प्रहरी कार्यालय तथा ट्राफिक कार्यालयबाट सञ्चालन गरिएका १८९ सचेतनामूलक कार्यक्रममा ११,३४२ जनाले सहभागिता जनाएका छन्।
प्रहरी नायब उपरीक्षक बस्नेतले यस्तो उपलब्धिले प्रहरी कार्यलाई अझ प्रभावकारी बनाउने र जनतालाई सुरक्षित वातावरण सुनिश्चित गर्न सहयोग पुग्ने विश्वास व्यक्त गरेका छन्।
