वीरगंज । पोषण शुशासन र बहुक्षेत्रीय पोषण योजना (तेस्रो चरण) सम्बन्धी तीन दिने तालिम धनुषाको जनकपुरस्थित अजनी स्वीट्स सभाहलमा सम्पन्न भएको छ ।
युरोपियन युनियनको सहयोगमा, एक्सन अगेंस्ट हङ्गर (ACF) र एन–टेक (N–Tec) को प्राविधिक सहजीकरणमा, मधेश प्रदेश सरकारको नीतिगत तथा योजना आयोग, जनकपुरधामको आयोजनामा सम्पन्न उक्त तालिममा मधेश प्रदेशका २१ स्थानीय संघ–संस्थाहरू सहभागी भएका थिए ।
तालिमको उद्देश्य प्रदेशस्तरमा पोषण शुशासन र बहुक्षेत्रीय पोषण योजना कार्यान्वयनलाई प्रभावकारी बनाउने र सरकारी निकाय, नागरिक समाजका संगठन तथा सरोकारवालाबीच सहकार्य र साझा बुझाइ विकास गर्नु रहेको थियो।
कार्यक्रममा मधेश प्रदेश नीति तथा योजना आयोगका सदस्य राजकुमार सिंहले पोषण शुशासन र बहुक्षेत्रीय पोषण कार्यक्रमलाई प्रभावकारी बनाउने प्रतिबद्धता जनाउँदै प्रदेश सरकार, स्थानीय तह तथा राष्ट्रिय–अन्तर्राष्ट्रिय निकायबीचको सहकार्य अपरिहार्य रहेको बताए।
समापन समारोहमा मधेश प्रदेश स्वास्थ्य मन्त्रालयका सचिव डा. ओमप्रसाद आर्याल, संघीय मामिला तथा सामान्य प्रशासन मन्त्रालयका प्रशासन अधिकृत दिपेश कटेल, तथा गैरसरकारी संस्था महासंघ नेपाल, मधेश प्रदेशका अध्यक्ष रामबाबु साह विशेष अतिथि रहनुभएको थियो।
तालिममा एन–टेकका कार्यकारी निर्देशक दिपक थापा, एसीएफ नेपालकी अनुपा महत, कार्यक्रम प्रबन्धक रंजन कपाली, एन–टेकका कार्यक्रम प्रबन्धक कुसुम वाग्ले, अनुगमन तथा मूल्यांकन अधिकृत सत्यराज उपाध्याय, र मधेश प्रदेशका कार्यक्रम अधिकृत हरिगेन्द्र सिंहले सहजीकरण तथा प्रशिक्षण प्रदान गरेका थिए।
तालिमबाट प्राप्त निष्कर्षका आधारमा मधेश प्रदेशमा दीर्घकालीन कार्ययोजना निर्माण गरी पोषणसम्बन्धी समस्या न्यूनिकरण तथा सुधारका दिशामा साझा प्रतिबद्धता सहित कार्य अघि बढाइने भएको छ।
