रक्सौल । भारत–नेपाल सीमामा आवतजावत गर्ने नागरिकहरूको पहिचानसहित कडाइपूर्वक जाँच गर्न सीमा सुरक्षा बल (एसएसबी) का महानिरीक्षक नशीथ कुमार उज्जवलले निर्देशन दिएका छन् ।
बुधबार एसएसबी सीमान्त मुख्यालय पटनाका महानिरीक्षक उज्जवलले रक्सौलस्थित ४७औँ वाहिनी एसएसबीको दुईदिने निरीक्षण भ्रमण सम्पन्न गर्दै सुरक्षा निकायहरूलाई सीमा नाकामा आवतजावतमा थप सतर्कता अपनाउन निर्देशन दिएका हुन् ।
निरीक्षणपछि आईसीपी रक्सौलमा आयोजित भारत–नेपाल सीमावर्ती जिल्लाको संयुक्त समन्वय समिति बैठकमा उनले सहभागीता जनाए । बैठकमा भारततर्फबाट पूर्वी चम्पारणका प्रमुख जिल्ला अधिकारी सौरभ जोरवाल, क्षेत्रीय मुख्यालय बेतियाका उप–महानिरीक्षक एस. सुब्रमण्यम, ४७औँ वाहिनी एसएसबी रक्सौलका कमाण्डेन्ट संजय पाण्डेय, मोतिहारीका प्रहरी अधीक्षक स्वर्ण प्रभातलगायत अधिकारीहरूको उपस्थिति थियो ।
नेपालतर्फबाट पर्साका प्रमुख जिल्ला अधिकारी तोयनारायण सुवेदी, एपीएफ (नेपाल) का डिआईजी अञ्जनीकुमार पोखरेल (ब्रिगेड–०३, भण्डारा, चितवन), नेपाल प्रहरीका वरिष्ठ अधिकारीहरू तथा अन्य प्रशासनिक अधिकारीहरू सहभागी थिए ।
निरीक्षणका क्रममा महानिरीक्षक उज्जवलले ४७औँ वाहिनी मुख्यालय र पन्टोका सीमा चौकीमा पुगेर गार्ड अफ अनर ग्रहण गरे । त्यसपछि उनले वृक्षारोपण गर्दै सैनिक सम्मेलनलाई सम्बोधन गरे । सम्मेलनमा उनले सीमाबाट आवतजावत गर्ने नागरिकहरूको पहिचान गरी कडाइका साथ जाँच–पडताल गर्न एसएसबीका जवानहरूलाई निर्देशन दिए । साथै, ड्युटीका क्रममा देखिने व्यक्तिगत समस्या सुनी जवानहरूको मनोबल उच्च राख्ने प्रतिवद्धता जनाए ।
संयुक्त बैठकमा आगामी बिहार विधानसभा चुनाव, तस्करी नियन्त्रण तथा सीमावर्ती सुरक्षासम्बन्धी विषयमा गम्भीर छलफल गरिएको थियो । बैठकपछि आयोजित पत्रकार सम्मेलनमा महानिरीक्षक उज्जवलले प्रेस तथा इलेक्ट्रोनिक मिडियाकर्मीहरूको प्रश्नहरूको उत्तर दिँदै सीमाको सुरक्षामा भारत–नेपाल दुवै पक्षको सहयोग अपरिहार्य रहेको बताए ।
