वीरगंज । सशस्त्र प्रहरी बल नेपाल नं.१३ गण हे.क्वा पर्सा र राजस्व अनुसन्धान कार्यालय बाराको संयुक्त टोलिले वीरगंजबाट ठूलो परिमाणमा सुन, चाँदी र नगद बरामद गरेको छ ।
विशेष सूचनाको आधारमा वीरगंज महानगरपालिका–८ माईस्थानस्थित अभिषेक सर्राफको घरमा छापा मार्दा अबैध रूपमा भन्सार छलि ल्याई गोदाममा राखिएको सुन र चाँदी फेला परेको सशस्त्र प्रहरीले जनाएको छ ।
संयुक्त टोलिले बरामद गरेको सुन–चाँदीको मापन गर्दा सुन २ किलाे २५४.८६ ग्राम, चाँदी १० किलाे ३५४.०७ ग्राम, सुन जस्तो देखिने ५५९.१० ग्राम, चाँदी जस्तो देखिने ५५० ग्राम तथा नगद नेपाली रुपैयाँ एक लाख ९ हजार र भारतीय रुपैयाँ ४१ हजार ६० फेला परेको हो ।
बरामद गरिएका वस्तुहरू आवश्यक कारबाही तथा अनुसन्धानका लागि राजस्व अनुसन्धान कार्यालय पथलैया, बारामा बुझाइएको सशस्त्र प्रहरी बल नेपाल नं. १३ गण, पर्साका सूचना अधिकारी प्रहरी नायब उपरीक्षक सुरज कार्कीले जानकारी दिए ।
