वीरगंज । बाराको जितपुर सिमरा उपमहानगरपालिका–२२ अमलेखगञ्ज मा शनिबार निःशुल्क स्वास्थ्य शिविर सम्पन्न भएको छ । अमलेखगञ्जस्थित अक्कलबहादुर कार्की अस्पतालको आयोजनामा दिपावली तथा छठ पर्वको अवसर पारेर उक्त शिविर आयोजना गरिएको हो।
शिविरमा नारायणी अस्पतालका डा. दीपक चौरसिया, न्युरो सर्जन डा. सफरोज अन्सारी, ईएनटी (कान, नाक, घाँटी) विशेषज्ञ डा. फिरोज अन्सारी, छाला रोग विशेषज्ञ डा. अभिषेक सुमन र नेत्र रोग विशेषज्ञ डा. प्रभात चौरसियाले स्वास्थ्य परीक्षण गरेका थिए।
स्वास्थ्य परीक्षणसँगै आवश्यक बिरामीहरूलाई निःशुल्क औषधि वितरण गरिएको डा. दीपक चौरसियाले जानकारी दिए।
शिविरमा दुई सयभन्दा बढी स्थानीयले विभिन्न स्वास्थ्य समस्याको परीक्षण गराएका थिए। आयोजक अस्पतालका प्रतिनिधिहरूका अनुसार, यस्ता स्वास्थ्य शिविरले ग्रामीण क्षेत्रमा स्वास्थ्य सेवाप्राप्तिमा सहजता ल्याउने र जनचेतना अभिवृद्धिमा सहयोग गर्ने अपेक्षा गरिएको छ।
