वीरगंज । सशस्त्र प्रहरी बल, नेपाल पर्साले वीरगंजमा सवारी साधनसहित ठूलो मात्रामा पटका नियन्त्रण गरी भन्सारमा दाखिला तथा नष्ट गरेको छ ।
सशस्त्र प्रहरी बल, प्रस्तावित सीमा सुरक्षा गुल्म वीरगंजबाट खटिएको टोलीले वीरगञ्ज–१६ भन्सार मेनगेट चेकपोस्टमा सवारी साधन चेकजाँच गर्ने क्रममा बा १२ च ३१०३ नम्बरको Hyundai Xcent कार नियन्त्रणमा लिएको हो ।
उक्त कारको तलासी गर्दा डिक्कीभित्र ९ वटा कार्टुनमा लुकाइछिपाइ राखिएका रु. ५०,००० बराबरका पटका फेला परेका थिए । आवश्यक प्रक्रिया पूरा गरी ती पटकाहरू पानीमा हालेर नष्ट गरिएको सशस्त्र प्रहरीले जनाएको छ ।
पक्राउ परेको उक्त कारको मूल्य १८ लाख अनुमान गरिएको र आजै वीरगंज भन्सार कार्यालयमा बुझाइएको सशस्त्र प्रहरी बल नेपाल नं. १३ गण, पर्साका सूचना अधिकारी प्रहरी नायब उपरीक्षक सुरज कार्कीले जानकारी दिए ।
