वीरगंज । पर्साको पोखरिया–लंगडी सडकखण्डमा सोमबार राति भएको मोटरसाइकल दुर्घटनामा एकजनाको मृत्यु भएको छ। मृत्यु हुनेमा धोबिनी गाउँपालिका वडा नम्बर २ भीखमपुर निवासी अन्दाजी ४३ वर्षीय दिनेश प्रसाद कुर्मी रहेका छन् ।
लंगडीबाट पोखरिया जाँदै गर्दा कुर्मीले चलाउँदै आएको मधेस प्रदेश ०२८ प ३७०१ नम्बरको मोटरसाइकल अनियन्त्रित भई पोखरिया नगरपालिका वडा नम्बर ३ बसतपुर नजिक दुर्घटनामा परेको प्रहरीले जनाएको छ।
दुर्घटनामा घाइते भएका कुर्मीलाई इलाका प्रहरी कार्यालय पोखरियाको टोलीले उद्धार गरी बाराको नौतनास्थित एलएस न्यूरो एण्ड जेनरल अस्पतालमा उपचारका लागि पठाएको थियो । तर, उपचारका क्रममा मंगलबार बिहान उनको मृत्यु भएको अस्पतालले पुष्टि गरेको छ।
इलाका प्रहरी कार्यालय पोखरियाका प्रहरी निरीक्षक स्वरुप शर्माले घटनाबारे थप अनुसन्धान भइरहेको जानकारी दिएका छन्।
