वीरगंज । अविरल वर्षाका कारण उत्पन्न संकटबीच सशस्त्र प्रहरी बल, नेपाल पर्साले कारागारदेखि स्थानीय बस्ती र पशु चौपायसम्मका सर्वसाधारणलाई सकुशल उद्दार गरेको छ ।
शनिबार सशस्त्र प्रहरी बल, नेपाल नं. १३ गण हे.क्वा पर्सा मातहतको कारागार सुरक्षा बेस बीरगंजले सहकार्यमा बीरगंज महानगरपालिका–५ स्थित कारागार कार्यालयमा जम्मा भएको पानी मोटरमार्फत निकालेर वातावरण सहज बनाएको हो ।
त्यसैगरी, असोज १९ गते खटिएको उद्दार टोलीले रौतहट बिन्दावन गाउँपालिका–८ घर भई हाल पर्सा–१६ भुटनदेवी मन्दिर नजिक बस्ने दिपक श्रीवास्तवको घरमा जमेको करिब ७–८ फिट पानीका कारण डुबानमा परेका ४ जनाको परिवारलाई सकुशल उद्दार गरी छिमेकी शंकर आचार्यको घरमा सुरक्षित राखेको छ ।
त्यस्तै, बीरगंज–१३ राधेमाईकी ४५ वर्षीय रिज्वान खातुनलाई ज्वरो आएका कारण डुबानमा फसेको अवस्थामा उद्दार गरी अस्पताल पुर्याइएको छ । साथै, बीरगंज–११ बिद्यापति नगरका ७ जना सदस्यीय परिवारलाई सुरक्षित स्थानमा स्थानान्तरण गरिएको हो ।
पर्सा पोखरिया नगरपालिका–२ लमरियामा पनि अविरल वर्षाका कारण डुबानमा परेका करिब १५–२० जनालाई सशस्त्र प्रहरीको उद्दार टोलीले सुरक्षित स्थानमा पुर्याएको छ ।
त्यसैगरी, सिर्सिया खोलामा पानीको बहाव बढेपछि बीरगंज गौशाला गाईफर्ममा फसेका १३२ वटा गाईलाई सशस्त्र प्रहरी बल नं. १३ गण पर्साबाट खटिएको टोलीले सकुशल उद्दार गरी सुरक्षित स्थानमा स्थानान्तरण गरेको जनाएको छ ।
यस्तै, बिन्दवासिनी गाउँपालिका–२ गर्दौलास्थित बीरगंज–पोखरिया सडक खण्डमा रुख ढलेर बाटो अवरुद्ध भएपछि सशस्त्र प्रहरी बेस बहुअर्वाभाठ्ठाबाट खटिएको टोलीले रुख पन्छ्याई सडक पुनः सुचारु गरेको छ ।
उक्त सम्पूर्ण उद्दार कार्य सशस्त्र प्रहरी बल, नेपाल नं. १३ गण हे.क्वा पर्साका सशस्त्र प्रहरी नायब उपरीक्षक सुरज कार्कीको समन्वयमा सम्पन्न भएको जनाइएको छ ।
