वीरगंज । सशस्त्र प्रहरी बल नेपाल नं. १३ गण पर्साको टोलीले ठूलो परिमाणको चरेश बरामद गरेको छ ।
सशस्त्र प्रहरी सहायक निरीक्षक नितेश कुमार साह कानुको कमाण्डमा खटिएको ७ जनाको मोबाईल टोलीले छिपहरमाई गाउँपालिका–४ बन्जारीस्थित भिष्वा–जानकी टोला सडकखण्डमा चेकजाँच गर्ने क्रममा भारततर्फ लैजाँदै गरिएको ९ किलो ५२२ ग्राम चरेश बरामद गरेको हो ।
बिआर २२ जे ३५५० नम्बरको होण्डा साइन मोटरसाइकलमा फल्स बटम बनाई लुकाइछिपाइ लैजाँदै गरिएको उक्त चरेश १९ वटा प्लास्टिकका प्याकेटमा फेला परेको सशस्त्र प्रहरीले जनाएको छ ।
सशस्त्र प्रहरीका अनुसार घटनामा संलग्न भारतको बिहार राज्य, पश्चिम चम्पारण जिल्ला, बेतिया कोईरी टोला वार्ड नं. ३७ का ३१ वर्षीय गुलाम मोहमदलाई पक्राउ गरी आवश्यक कानुनी कारबाहीका लागि सम्बन्धित निकायमा बुझाउने तयारी भइरहेको छ ।
पक्राउ परेकाको साथबाट आधार कार्ड र कार्बोन कम्पनीको कीप्याड मोबाईल फोन समेत बरामद गरिएको सशस्त्र प्रहरी बल नेपाल नं. १३ गण, पर्साका सूचना अधिकारी सशस्त्र प्रहरी नायव उपरिक्षक सुरज कार्कीले जानकारी दिए ।
