वीरगंज । तिन महिना ढिलाे पर्साको धोबीनी गाउँपालिकाकाे ११औं गाउँसभा सम्पन्न भएको छ । आइतबार सम्पन्न गाउँ सभाले चालु आर्थिक वर्ष २०८२/८३ का लागि नीति तथा कार्यक्रम सार्वजनिक गर्दै ३३ करोड ८८ लाख ८८ हजार ९ सय ८१ रुपैयाँ बराबरको बजेट पारित गरेको हाे ।
गाउँपालिकाकी उपाध्यक्ष मंजु देवी पटेलको आदेशअनुसार प्रमुख प्रशासनिक अधिकृत कृष्ण प्रसाद खतिवडाले बजेट प्रस्तुत गरेका थिए । धोबीनी गाउँपालिका कार्यालयकाे सभा हलमा भएकाे सभाकाे गाउँपालिका अध्यक्ष मदन प्रसाद चौहानले उद्घाटन गरेका थिए ।
गाउँ सभालाई सम्बाेधन गर्दै अध्यक्ष चौहानले स्वास्थ्य, शिक्षा, कृषि, महिला तथा बालबालिका, पर्यटन र भौतिक पूर्वाधार विकासलाई प्राथमिकतामा राखेर बजेट ल्याइएकाे वताए । उनले राजनीतिक समस्याका कारण गाउँसभा ढिला भए पनि अब विकास र जनताको काम छिटो हुने प्रतिबद्धता जनाए ।
गाउँपालिकाका प्रमुख प्रशासकीय अधिकृत कृष्ण प्रसाद खतिवडाले इमानदारीपूर्वक काम गर्दै धोबीनीलाई स्वच्छ र समृद्ध नमूना गाउँपालिका बनाउने प्रतिवद्धता जनाए ।
गाउँपालिका अध्यक्ष चौहानको अध्यक्षतामा सम्पन्न गाउँ सभामा उपाध्यक्ष मंजु देवी कुर्मिन, वडाअध्यक्षहरू, राजनीतिक दलका प्रतिनिधि, गाउँसभा सदस्य, शिक्षक, स्थानिय पत्रकार, सुरक्षाकर्मीलगायतको सहभागिता थियो । कार्यक्रमको सहजीकरण शिक्षा शाखा प्रमुख बृजकिशोर त्रिपाठीले गरेका थिए ।
गाउँ सभा ढिलाे भएका कारण यस बर्षकाे दशैंमा गाउँपालिका अन्तर्गतका शिक्षक र कर्मचारीहरुले तलब पाएका छैनन् । अब गाउँ सभा सम्पन्न भई बजेट समेत पारित भईसकेका कारण तिहारमा कर्मचारीहरुले बाकी रहेकाे ६ महिनाकाे तलब पाउनुकाे साथै विकास निर्माणकाे काम सुचारु हुने छ ।
