वीरगंज । सशस्त्र प्रहरीले स्रोत नखुलेको ८ लाख रुपैयाँभन्दा बढी नगदसहित एक व्यक्तिलाई नियन्त्रणमा लिएको छ ।
सशस्त्र प्रहरी बल नेपाल नं.१३ गण पर्साका सूचना अधिकारी डिएसपी सुरज कार्कीका अनुसार मंगलबार दिउँसो करिब १:५० बजे वीरगंज महानगरपालिका–१६, भन्सार मेनगेट नजिकै सशस्त्र प्रहरीकाे टोलीले भारतबाट नेपालतर्फ आउँदै गरेको बिआर ०५ बिएफ ०४६९ नम्बरको मोटरसाइकल चेकजाँच गर्ने क्रममा उक्त रकम फेला पारेको हो।
सशस्त्र प्रहरी बल नेपाल नं. १३ गण, पर्साका सशस्त्र प्रहरी सहायक निरीक्षकद्वय सुजय कुमार सिंह र सशस्त्र प्रहरी सिमा सुरक्षा गुल्म, वीरगंजका सहायक प्रहरी निरिक्षक मोहमद मुस्ताक अलीको कमाण्डमा १० जनाकाे टाेली खटिएकाे थियाे ।
उक्त चेकजाँचको क्रममा पर्साको सखुवापर्सौनी गाउँपालिका–०५ निवासी करिब ४३ वर्षीय राजेश कुमार साह तेलीबाट नेपाली नगद ८ लाख ७ हजार र करिब एक लाख ५० हजार मूल्य बराबरको मोटरसाइकल बरामद गरिएको सशस्त्र प्रहरीले जनाएकाे छ ।
बरामद गरिएको रकममा एक हजार दरका ५१५ वटा, पांच सय दरका ५७२ वटा र एक सय दरका ६० वटा नोटहरू रहेका छन्। बरामद व्यक्ति र रकमसहितको मोटरसाइकललाई आवश्यक कारबाहीका लागि वीरगंज भन्सार कार्यालयमा बुझाउने प्रक्रिया भइरहेको सूचना अधिकारी डिएसपी कार्कीले जानकारी दिए ।
