वीरगंज । सशस्त्र प्रहरीले मोटरसाइकलसहित प्रतिबन्धित कुखुराको चल्ला बरामद गरेको छ । वीरगंज महानगरपालिका–१९ केहुनियास्थित सशस्त्र प्रहरी बल नं. १३ गण हे.क्वा. पर्साबाट खटिएको मोबाइल टोलीले मोटरसाइकलमा लोड गरी नेपालतर्फ ल्याउँदै गरिएको प्रतिबन्धित कुखुराका चल्ला बरामद गरेको हो ।
शुक्रबार बिहान करिब ६:०० बजे सशस्त्र प्रहरी सहायक निरीक्षक संजिव कुमार यादवको कमाण्डमा खटिएको सात जनाको टोलीले भारतबाट अवैध रूपमा ल्याइँदै गरेको ना ४१ प ४२२ नम्बरको मोटरसाइकलमा लोड ४ हजार गोटा बोईलर कुखुराको चल्ला नियन्त्रणमा लिएको सशस्त्र प्रहरी बल नं. १३ गण पर्साले जनाएको छ ।
सशस्त्र प्रहरीका अनुसार उक्त चल्लाको अनुमानित मूल्य एक लाख रुपैयाँ बराबर रहेको छ । बरामद गरिएको चल्लालाई ११:१५ बजे स्थानिय पत्रकार, जनप्रतिनिधि र नेपाल प्रहरी तथा पशु क्वारेन्टिनका प्रतिनिधिहरूको रोहबरमा गण परिसरभित्र खाडल खनी पुरेर नष्ट गरिएको छ।
बरामद मोटरसाइकललाई भने भन्सार बुझाउने प्रक्रिया अगाडि बढाइएको सशस्त्र प्रहरी बल नम्बर १३ गण, पर्साका सूचना अधिकारी प्रहरी नायब उपरीक्षक सुरज कार्कीले जानकारी दिए।
