वीरगंज । आज दिउँसो परवानिपुरस्थित नेपाल विद्युत प्राधिकरणको १३२ केभी पावर लाइन रुम (पाइनलरुम) मा रहेको भीसीबी ब्रेकर बिस्फोट हुँदा बारा–पर्सा क्षेत्रको विद्युत आपूर्ति पूर्णरुपमा अवरुद्ध भएको छ।
प्राधिकरणका एक कर्मचारीका अनुसार कन्ट्रोल रुमको पछाडिबाट सर्टसर्किट भएर आगलागी भएको आशंका गरिएको छ। आगलागीका कारण सम्पूर्ण प्यानल जलेको र बारा–पर्साका १४ वटा फिडरमध्ये ५ वटा फिडर पूर्णरुपमा ध्वस्त भएको प्रारम्भिक जानकारी प्राप्त भएको छ। बाँकी फिडरहरूमा पनि क्षति पुगेको छ।
घटनापछि लागेकाे आगो बिरगञ्जबाट गएको दमकल, प्रहरी र स्थानीयवासीको सहयोगमा नियन्त्रणमा लिन सफल भएको हो। प्राधिकरणका अनुसार क्षतिग्रस्त फिडरहरूमा सिमरा, कृषि, गण्डक, डाबर, ग्रामीण, नरायणी, परवानिपुर, जगदम्बा, चोर्नि र बगही लगायतका फिडरहरू रहेका छन्।
आगजनीका कारण तीन जना कर्मचारी सामान्यरूपमा घाइते भएका छन्। उनीहरूको उपचार स्थानीय स्वास्थ्य संस्थामा भइरहेको छ।
हाल मर्मत कार्य सुरु भए पनि क्षति व्यापक भएकाले छिट्टै विद्युत आपूर्ति सुचारु हुने सम्भावना न्यून रहेको प्राधिकरणले जनाएको छ।
