काठमाडौँ । देशभर सुरक्षा सतर्कता बढाइएका बीच नेपाली सेनाले विभिन्न स्थानहरूमा महत्वपूर्ण सफलता हात पारेको छ।
सिन्धुली जिल्ला मरिन–४ का एक व्यक्तिले काठमाडौँको डल्लु इलाकामा खटिएको नेपाली सेनाको गस्ती टोलीलाई ९ मि.मि. चाइनिज पेस्तोल (एक थान) स्वेच्छाले बुझाएका छन्। यससँगै हालसम्म देशभर विभिन्न स्थानहरूबाट २६८ नाल हतियार बरामद गरिएको छ।
झापाको भद्रपुर नगरपालिका–८ स्थित अस्पताल चोकमा फेला परेको शंकास्पद वस्तु नेपाली सेनाले सुरक्षित रूपमा डिस्पोज गरेको छ। यस्तै, काठमाडौँको महाराजगञ्ज इलाकामा विभिन्न मोबाइल र विदेशी मुद्रा सहित दुई जना शंकास्पद व्यक्तिहरूलाई नियन्त्रणमा लिइएको छ।
धादिङको गजुरीस्थित धादिङ कारागारबाट भागेका कैदीहरूमध्ये ४३ जनालाई समेत सुरक्षा निकायहरूले नियन्त्रणमा लिएका छन्।
सुरक्षा निकायहरूले सर्वसाधारणलाई सतर्क रहन र कुनै पनि शंकास्पद गतिविधि वा वस्तुको बारेमा तत्काल जानकारी दिन आग्रह गरेका छन्।
