काठमाडौं । जेन–जेड (Gen-Z) आन्दोलनका क्रममा भएको जनधनको क्षतिप्रति संघीय संसदले गहिरो दुःख व्यक्त गर्दै मृतकहरूलाई श्रद्धाञ्जली अर्पण गरेको छ।
प्रतिनिधि सभाका सभामुख देवराज घिमिरे र राष्ट्रिय सभाका अध्यक्ष नारायण प्रसाद दाहालले संयुक्त रुपमा वक्तव्य जारी गर्दै आन्दोलनमा ज्यान गुमाएका युवाहरू र कर्तव्य निर्वाहका क्रममा ज्यान गुमाएका प्रहरीहरूमा हार्दिक श्रद्धाञ्जली तथा शोकाकुल परिवारजनमा समवेदना व्यक्त गरेका छन् ।
वक्तव्यमा आन्दोलनमा घाइते भएका सबैको शीघ्र स्वास्थ्य लाभको कामना गर्दै उपचारमा कुनै कमी हुन नदिन सम्बन्धित संयन्त्रलाई विशेष आग्रह गरिएको छ।
२०७९ भदौ २४ गते बानेश्वरस्थित संघीय संसद भवन, सिंहदरबारस्थित संघीय संसद सचिवालय लगायत विभिन्न सरकारी कार्यालय, सञ्चार गृह, व्यापारिक प्रतिष्ठान तथा सार्वजनिक सम्पत्तिमा भएको आगजनी र तोडफोडले देशलाई अपूरणीय क्षति पुर्याएको वक्तव्यमा उल्लेख छ।
देशको विद्यमान विषम परिस्थितिमा नागरिक स्वतन्त्रता, राष्ट्रिय एकता र स्वाधीनतालाई शिरोपर गर्दै संवैधानिक प्रक्रियाबाटै निकास दिन राष्ट्रपतिज्यूले पहल गरिरहनु भएको उल्लेख गर्दै, विधिको शासन र संविधानवादबाट बाहिर नजानु पर्नेमा संसद दृढ रहेको जनाइएको छ।
वक्तव्यमा आन्दोलनरत पक्षका मागहरू सम्बोधन गर्दै अझ उन्नत, समृद्ध र बलियो लोकतन्त्र निर्माणका लागि सबैलाई अपिल गरिएको छ।
