काठमाडौँ । नेपाली सेनाले देशभर विभिन्न सुरक्षा गतिविधिहरूमा सक्रिय भूमिका निर्वाह गरेको छ । काभ्रेपलान्चोक जिल्लाको बनेपा–९ स्थित नयाँ बस्तीमा फेला परेका ८ वटा सकेट बमलाई नेपाली सेनाले सुरक्षित तरिकाले डिस्पोज गरेको जनाएको छ।
त्यसैगरी, सुन्धरास्थित केन्द्रीय कारागारबाट भागेका ४ जना कैदीबन्दी, डोटीको दिपायल सिलगढीस्थित बाल सुधार गृहबाट भागेका ३ जना बालबन्दी, धादिङको गजुरीस्थित धादिङ कारागारबाट फरार भएका ३९ जना कैदी र बाँकेको डडुवा स्थित जयन्दु बाल सुधार गृहबाट भागेका १६ जना बालबन्दीलाई नियन्त्रणमा लिइएको नेपाली सेनाले जनाएकाे छ ।
बाँकेको नेपालगञ्जस्थित जिल्ला कारागारमा होहल्ला तथा आगजनी गरी बाहिर निस्कन खोज्ने कैदीबन्दीलाई पनि नेपाली सेनाले नियन्त्रणमा लिएको छ । सो क्रममा एक जना कैदी घाइते भएको बताइएको छ ।
यस्तै, ललितपुरको भैसेपाटीमा रहेको स्थानीय प्रहरी चौकीमा सरसफाइ गर्दै स्थानीय बासिन्दाले कार्यरत प्रहरीलाई स्वागत गरेका छन् । हालसम्म विभिन्न स्थानहरूबाट ९७ नाल हतियार बरामद भएको नेपाली सेनाले जनाएको छ ।
