वीरगंज । जेन जी आन्दोलनको चपेटामा परेर खानेपानी मन्त्री प्रदीप यादवको वीरगंजस्थित निवासमा मंगलबार आक्रोशित प्रदर्शनकारीहरूले आगजनी गरेका छन्।
सरकारद्वारा गरिएको दमनको विरोधस्वरूप मन्त्री यादवले केही घण्टाअघि मात्रै सामाजिक सञ्जालमार्फत पदबाट राजीनामा दिएका थिए । उनले युवापुस्तासँग ऐक्यबद्धता जनाउँदै, “हिजो Gen Z पुस्ताले गरेको आन्दोलनको समर्थन र दमनको विरोध गर्दै खानेपानी मन्त्रालयको मन्त्री पदबाट राजीनामा दिने घोषणा गर्दछु,” भनेका थिए।
तर, राजीनामापछि पनि आन्दोलनकारीको आक्रोश रोकिएन र यादवको वीरगंजस्थित घरमा आगजनी गरिएको हो । यसअघि कानुन न्याय तथा संसदीय मामिला मन्त्री अजय चाैरसियाको वीरगंज-११ श्रीपुर नयाँबस्तीस्थित घरमा ढुंगामुढा भएको थियो, जसमा घरका सिसा फुटेका थिए।
पर्सा क्षेत्र नं. २ बाट निर्वाचित सांसद चाैरसियाले अहिले सम्म मन्त्री पदबाट राजिनामा दिएका छैनन् ।
Gen Z आन्दोलनकै क्रममा सोमबार मात्र १९ जना युवाले ज्यान गुमाएका थिए । त्यसयता देशभर जनदबाब तीव्र बनेको छ । देशभर प्रदर्शन भएजस्ताे वीरगंजकाे पनि विभिन्न ठाउँमा प्रदर्शन, ताेडफाेड र आगजनीकाे घटना भइरहेका छन् ।
