वीरगंज । मानव बेचबिखन तथा ओसारपसारविरुद्धको राष्ट्रिय दिवसका अवसरमा शुक्रबार महिला, बालबालिका तथा जेष्ठ नागरिक मन्त्रालयले जिल्ला प्रहरी कार्यालय पर्साका प्रमुख प्रहरी उपरीक्षक (एसपी) गौतम मिश्रलाई सम्मान गरेको छ।
७७ वटै जिल्ला प्रहरी कार्यालयहरूमध्ये मानव बेचबिखनविरुद्धको प्रभावकारी अभियान सञ्चालन गरी पर्सा प्रहरीले पहिलो स्थान हासिल गरेको हो । एसपी मिश्र ७ महिना अघि पर्सा प्रहरी प्रमुखका रूपमा हाजिर भएपछि मानव बेचबिखनविरुद्ध कठोर अभियान चलाएका थिए ।
उनको कार्यकालमा १५ वटा मुद्दा दर्ता, १७ जना अभियुक्त पक्राउ, करिब ३०० जना जोखिममा परेका महिला तथा बालबालिकाको उद्धार, ३५० भन्दा बढी सचेतनामूलक कार्यक्रम सञ्चालन र विभिन्न सरोकारवालासँग अन्तरक्रिया गरी अपराध नियन्त्रणमा ठोस उपलब्धि हासिल गरिएको छ ।
महिला तथा बालबालिका मन्त्रालयले यिनै उपलब्धिहरूका आधारमा पर्सा प्रहरीलाई ‘मानव बेचबिखनविरुद्ध उत्कृष्ट जिल्ला’ घोषणा गर्दै प्रमुख मिश्रलाई सम्मानित गरेको हो ।
