वीरगंज । गत आर्थिक वर्षको विकास खर्च विवरण सार्वजनिक नगरेको आरोप लगाउँदै स्थानीयहरूले सोमबार पर्साको धोबनी गाउँपालिका कार्यालयमा तालाबन्दी गरेका छन् । दिउँसो साढे ११ बजेदेखि सुरु भएको तालाबन्दीका कारण गाउँपालिका अध्यक्ष मदनप्रसाद चौहानसहित जनप्रतिनिधि र कर्मचारीहरू कार्यालयभित्रै थुनिएका थिए ।
सूचनाको हक प्रयोग गरी विकास निर्माणमा गरिएको खर्चको प्रमाणित विवरण माग्दा कार्यालयले पूर्ण विवरण नदिएको भन्दै आन्दोलनकारीहरू आक्रोशित बनेका हुन् । उनीहरूले व्यापक अनियमितता भएको दाबी गर्दै कार्यालयको मुख्य गेटमा तालाबन्दी गर्ने मात्र होइन, टायर बालेर विरोध प्रदर्शनसमेत गरेका छन् ।
विरोध प्रदर्शनमा नेकपा एमालेका स्थानीय नेता तथा कार्यकर्ताको सक्रिय सहभागिता रहेको छ । स्थानीयहरूको भनाइ अनुसार पटक–पटक ताकेता गर्दा पनि मागिएको सूचना उपलब्ध नगराइएकाले बाध्य भएर आन्दोलन गरिएको हो ।
यता, गाउँपालिका अध्यक्ष चौहानले भने तालाबन्दीलाई राजनीतिक पूर्वाग्रहसहितको गतिविधि ठहर गर्दै गाउँपालिकाले कुनै सूचना लुकाउने प्रयास नगरेको दाबी गरे । उनका अनुसार प्रमुख प्रशासकीय अधिकृत सरुवा भएर गएको कारण तत्काल विवरण उपलब्ध गराउन ढिलाइ भएको मात्र हो । नयाँ अधिकृत हाजिर भइसकेकाले मागअनुसार सूचना उपलब्ध गराइने उनले स्पष्ट पारे ।
अध्यक्ष चौहानले “गाउँपालिकाको गेट आम सर्वसाधारणका लागि सधैँ खुला छ” भन्दै प्रदर्शनकारीलाई तालाबन्दी अन्त्य गरी संवादमा आउन आह्वान गरेका छन् ।
