सेढवा । भौतिक संरचनाको विकाससँगै परम्परा, धर्म र संस्कृतिको संरक्षण गर्नु पनि सबैको नैतिक दायित्व भएको मधेश प्रदेश सरकारका भूमि व्यवस्था, कृषि तथा सहकारी मन्त्री जनार्दन सिंह क्षेत्रीले बताएका छन्।
जगरनाथपुर गाउँपालिकाले आयोजना गरेको तीज विशेष कार्यक्रममा शुभकामना दिँदै मन्त्री क्षेत्रीले धार्मिक परम्परा र संस्कृतिलाई आधुनिकताको नाममा बिसंगति र विकृतिमा जान नदिइ यसको संरक्षण गर्न समुदायले पहल गर्नुपर्नेमा जोड दिए।
उनले विगतमा दैनिक घर–घरमा हुने पाठ–पूजाको परम्परा हराउँदै गएकाले युवा पुस्ता मद्यपान र लागुऔषध दुव्र्यसनतर्फ आकर्षित हुँदै गएको बताए। यस्तो अवस्थामा समाजलाई स्वस्थ बनाउन महिलाहरूले महत्वपूर्ण भूमिका खेल्न सक्ने भएकाले उनीहरू अग्रसर हुनुपर्ने उनले आग्रह गरे।
जगरनाथपुर गाउँपालिकाका अध्यक्ष श्रीकान्त प्रसाद यादवको सभापतित्वमा सम्पन्न कार्यक्रममा उपाध्यक्ष बबिता सिंह क्षेत्री, प्रमुख प्रशासकीय अधिकृत सन्देश कुमार यादव, नेपाली कांग्रेस पर्साका प्रवक्ता रमेश पाण्डे, कोषाध्यक्ष प्रेम बहादुर थापाले शुभकामना मन्तव्य व्यक्त गरेका थिए।
नेपाल शिक्षक संघ जगरनाथपुरका अध्यक्ष रुपनारायण साहले सञ्चालन गरेको कार्यक्रममा महिला जनप्रतिनिधि, शिक्षिका, स्वास्थ्यकर्मी तथा अन्य महिलाहरूले तीजका गीतमा नृत्य प्रस्तुत गरेका थिए ।
